WILLEMSTAD.- Si hende no komportá nan awe durante di e proseso di votashon, kosnan por sali for di man pa ku e vírus di Corona riba nos isla. E preokupashon aki e tim forma pa e epidemiólogo dr. Izzy Gerstenbluth, sra. Stella van Rijn – sekretario general di ministerio di Asuntunan General, Lesley Fer – direktor di direktorado di kontrol di riesgo i maneho pa kalamidat (DRR) i Sheryl Losiabaar – Konseho Supremo Elektoral, a trese dilanti.

Awe tin elekshon na Kòrsou i e tim ta teme ku elekshon lo bira un evento di plamashon dje vírus di Corona aun mas riba nos isla, si hende no tene nan mes na regla.

Sra. van Rijn a bisa ku e biaha aki e situashon na urnanan ta diferente. No tin hende ta repartí folder na porta di urnanan. Na kada urna tin hende pa kordiná e hendenan ku ta bai vota. Hasta lo tin mondkapje i oro produktonan di higiena na urnanan.

A papia ku tur partido pa e personanan ku nan ke pa hasi e parti di supervishon den kuadro di transparensia durante di e proseso di elekshon. Na momentu ku e urna habri mainta i anochi ora e sera lo tin dos hende. No tin hende pa kontrolá e lista di votadó. Asina ta purba di evitá kontagio.

E tim ta konsiente ku komportashon di hendenan/votadónan no ta den nan man.

Tambe a hasi apelashon na partidonan polítiko pa no bai buska hendenan vulnerabel pa bai vota den bùs manera a sosodé den pasado. Spesialmente hendenan den kas di grandinan. E tim ta pidi pa no bai buska hendenan grandi pa vota. Laga esaki pa e kas di kuido mes organis’é òf famianan buska nan grandinan pa bai vota.

Banda di esaki toke de keda ta keda 9’or di anochi i mester kumpli kuné. Partidonan polítiko por bai di forma virtual for di nan sede pa nan simpatisantenan por sigui nan.

Otro yamada ta pa no warda te na último pa bai vota, bai vota trempan.

Sra. Losiabaar reiterá ku nan a pidi koperashon i a hasi apelashon na tur partido pa tene kuenta ku no por tin aglomerashon di nan simpatisantenan na urna nan. Solamente tres hende pro bai ku e lider pa vota. KSE ta organisá elekshon, pero e responsabilidat pa kuida den e pandemia i e proseso di votashon ta di kada ken.