Buskando solushon, e siman aki mes ta papia ku asosiashon di seguro

WILLEMSTAD.- A kai un desishon resientemente ku Hospital St.Elisabeth (Sehos) no ta implementá e oumentu di tarifa ku nan a anunsiá anteriormente. Esei ta despues ku Sehos a bai mesa ku minister di Salubridat, Ministerio di Desaroyo Ekonómiko i kompanianan di seguro. E siman aki Sehos ta papia ku e asosiashon di kompanianan di seguro pasobra e situashon tin hopi urgensia. Kada luna ku Sehos no por haña e adaptashon nesesario esei ta kosta e instituto 500.000 florin na omzet. Pues hospital ta haña di ménos mei mion florin i esei ta poniendo preshon hopi grandi riba situashon di e hospital nashonal. Na palabra Elvis Thode direktor finansiero di Hospital St.Elisabeth, den deklarashon na EXTRA.

Manera EXTRA a informá resientemente (9 aprel) Hospital a anunsiá na kompanianan di seguro ku lo adaptá tarifanan pa servisio ku ta duna na pashèntnan di e kompanianan. Esaki lo nifiká un oumentu di tarifa pa e kompanianan di seguro. EXTRA a bai chek bek ku Sehos pasobra si nan a bisa bia pasa ku nan situashon ta delikado, EXTRA a bai chek kon e situashon a sigui despues di e ‘status quo’. Na mesa minister di Salubridat sra. Susanne Camelia-Romer a mustra partidonan ku ta mihó papia ku otro pa yega na solushon, sigur despues di tantu diskushon den komunidat. Sehos ta pendiente pa tende si MEO ta hala aden e landsbesluit di 2009 òf ki otro desishon ta tuma. Sehos a pidi un kombersashon ku e kompanianan di seguro, esaki ta nifiká ku mester papia ku alrededor di 110 kompania tantu lokal komo internashonal. E asosiashon lokal ta representá alrededor di 27% di kompanianan di seguro. E punto positivo den esaki ta ku e siman aki Sehos ta spera di reuní ku e asosiashon.

Riba e pregunta te kon leu Sehos por sigui drai sin haña e adaptashon tan nesesario, sr. Thode a duna di konosé ku kada luna ku Sehos no logra e ahuste nesesario e ta kosta 500.000 florin. Den mes rosea e direktor finansiero a kontesta ku minister di Salubridat ta na altura di e situashon.  Mas aleu Thode ta indiká ku e situashon ta di tal forma ku kada 10 mil florin ku Sehos no haña tin un impakto riba nan. Hospital ta konsiente ku no ta awor e situashon di défisit a surgi. Ta algun dékada kaba ku Sehos ta konfrontá e tipo di problema aki, sinembargo si pa un pashènt pasa un dia den hospital ku kuido profeshonal i aparatonan sofistiká 24 ora, esei  ta kosta por ehèmpel 1000 florin pa dia pero Sehos por kobra seguronan solamente 600 florin, ta nifiká ku ta Sehos ta pagando kuido pa e grupo di pashèntnan ku tin seguro médiko privá. Elvis Thode a splika EXTRA ku algu bon ta ku e parti grandi di pashèntnan ku ta kai bou di SVB si ta kubri. Ku otro palabra gobièrnu a kumpli ku su parti kaba. Mas detaye den edishon di EXTRA.