Un aksidente ku a laga su kasá paralisá, a pone ku awe Solange Concincion i su famia ta biba na Ulanda. Teniendo na kuenta ku e ta un persona ku no ta sinta ketu, el a sigui sondia posibilidatnan i awe e ta traha arte di klei, tur enfokando riba Kòrsou i su historia.

“Mi ta biba na Ulanda pero mi kurason ta bati pa Kòrsou. Mi ta aki pa motibu di desgrasia ku mi kasá a haña na Kòrsou. Papiando di mi arte mi por bisa ku nos tin 6 aña na Ulanda i durante di e añanan ei mi tabata sòru pa mi kasá pero na Kòrsou mi tabata traha obra di man na skol i tambe hasi dekorashonnan i tur esei ku mi mannan. Pero tur kos a para ketu dor di e desgrasia di mi kasá. Mi a bira poko desesperá sin ta hasiendo nada pa ku mi mes. Mi mes a bai manera muri. Mi a hasi orashon na Dios pa sa kiko e ke pa mi hasi. Mi tin un propósito riba e mundu aki i mi ke kumpli kuné. Dios a traha nos ku su mannan i mi tambe ta gusta usa mi mannan. Mi mannan ta hopi bon i mi tin arte den nan. Dios a traha nos di tera i p’esei mi a bai traha ku klei. Formando poko poko, di lokual mi no a pensa a bira loke mi tin awe”, tabata palabranan di Solange Concincion.

Traha ku man....

El a konta Djasabra ku nunka el a traha ku klei. Semper ku paña, palu, karton pero nunka di klei. Awor aki e tin un aña trahando obranan di klei. “Mi ta ‘geniet’ di dje”, asina el a bisa ku un sonrisa. El a splika nos ku kada obra pe ta algu nobo. I den prinsipio ku e tabata trahando su obranan, e tabata haña reakshon tras di reakshon. E hendenan tabata pidié pa e bende, pero pe tabata algu personal pe mes. Pero segun el a sigui traha, e kos a bira algu mas grandi ainda i el a disidí ku e ke publiká Kòrsou na Ulanda.

E arte di Solange ta varia. Tin diferente arte ku el a traha a base di su mes eksperensia. Por ehèmpel tin un ku yama Mai Nini ku Solange ta konsiderá komo su wela. Su wela tabata un hende yen i e obra ta kaminda e ta hala funchi. E tin otro obra Mai Bir ku tambe ta otro di su wela ku ta bariendo kurá. Solange a kue nòmbernan di ántes ku tabata usa i a usa esakinan pa su produktonan. Tin Nene, shon Ka, e tin su Opa ku ta kunukero ku ta sòru pa bestia tambe i el a dun'é e nòmber di Nene. E tin e obra di laba paña ku washi.

Nòmbernan di ántes....

Solange a splika ku segun e ta traha, segun su obranan ta hañando forma, e ta duna nan nòmber. Segun e ta traha su mente ta riba Kòrsou. E tin un obra di un buriku ku ántes tabata ser usá a transportá awa. Tin e muhé ku ta bati piská. “Segun mi mente kòrda mi ta hink'é den forma”. Tur loke e ta traha ta ku su man. Nada di malchi. Algun kara komo e no tin e eksperensia di wowo, nanishi i boka e por usa un malchi pero sobrá ta sin malchi. Esaki ta nifiká ku kada obra ta úniko. No tin meskos. Nan por parse otro pero manera el a bisa nada ku e traha no tin dos.

Solange no tin un shòp pero tur su obranan ta na kas mes. Tur hende ku ta deseá ta djis yam’é i por pasa serka dje segun sita pa mira kiko e tin di ofresé.

Tur su obranan Solange mes ta traha. E ta traha nan poko poko, laga nan seka i despues fèrf i duna nan e kolónan tropikal manera nos konosé na Kòrsou.

Kambio drástiko....

Pa loke ta e bida na Ulanda Solange a konta Djasabra ku nunka el a traha afó. Den 6 aña na Ulanda el a traha pa su kasá. E mes ta sòru pa su kasá. E bida na Ulanda no ta malu. E ta mihó ku na Kòrsou sigur pa su kasá i su limitashonnan. Tabata un desishon radikal ku Solange a tuma, den dos pa tres luna el a bende tur kos di kas, hür su kas i bai Ulanda.

E obranan di Solange ta karga e nòmber artístiko di Soliart. I e ta bon konosí kaba. Segun el a konta Djasabra awor aki e ta hasiendo su mes konosí via di FB i tambe su wèpsait i Instagram. I e reakshonnan ta drentando ounke e ta kresiendo pasobra ta algu nobo.

Eksposishon di Soliart....

I den e kuadro aki dia 21 di yanüari awor Solange lo bai tin un eksposishon pa promé biaha kaminda e lo eksponé públikamente su obranan. Esaki lo ta na Gemaal op Zuid Pretorialaan 141, 3072EL na Rotterdam. E eksposishon lo ta di mitar di 6 di atardi pa mitar di 9 di anochi.

Solange a bisa ku loke e ta hasiendo te ainda ta komo talento i awor e ta bai mas den grandi. E aña aki lo bai tin hopi kambio i progreso pa ku e obranan di Soliart. Un di nan sigur ta ku su obranan lo bai keda registrá. Tin mas idea nobo na kaminda pa Kòrsou i Ulanda.

Eksportá....

I un di e ideanan ta pa duna e enseñansa di arte aki tambe na hóbennan. Meskos ta su intenshon pa e manda su obranan Kòrsou e aña aki i otro parti di mundu. E obranan kai no ta pa antianonan so pero pa turistanan tambe.

Tin obranan grandi pero obranan masha chikí manera kabes pa pòtlot, kadena, arte pa pega na eiskast, tekstonan inspirativo i hopi mas.

Perseverá.....

Mi proseso di mi bida a hiba mi na mi obranan, kada hende ta pasa den proseso di bida kisas no dushi pero perseverá i lucha pa logra bo meta. Meskos ku oro ta pasa dor di kandela i despues bo por bistié, meskos un pòtlot ora sleip e, e ta skibi nèchi i klùr nèchi kuné meskos mi bida tambe pa mi por a saka loke tin den mi. Perseverá i no entregá. Tin momentu ta mustra difísil pero e temporada ta masha chikí i p’esei perseverá.