Tim di ‘Shap Polítiko’ a kondusí e investigashon

WILLEMSTAD.-  Un estudio ku ICUC pa medio di tim Shap Polítiko a hasi riba gastunan di kampaña pa elekshon, a yega na e resultado ku kada partido ta gasta entre mei mion pa kasi un mion florin den kampaña pa elekshon. Den luna di yanüari 2021 Inter Continental University of the Caribbean (ICUC) a hasi un investigashon tokante di gastunan ku partidonan polítiko ta hasi den temporada di elekshon.

Un grupo chikí, formando e núkleo di e programa di Radio ‘Shap’ tabatin enkargo di e estudio aki.

Meta di e investigashon kòrtiku aki ta pa haña un bista kiko un partido ‘averahe’ o partido ‘mediano’ tin na gastunan finansiero durante di un elekshon. A usa aki e siguiente referensia:

Partido averahe o mediano ta referí aki ku e gastu ta averahe/mediano. No ku e partido ta mediano. Esta un partido ku a kaba di lanta por ta muy bien un partido averahe.

E periodo ku a wak ta unu promé ku elekshon (3 pa 4 luna), durante di elekshon i despues di elekshon (1 luna).

No a tene kuenta aki ku e periodo di pre-elekshon, esta ta asumí ku e gastunan aki ta solamente pa elekshon.

Ta asumí ku e gastunan aki ta gastunan di e ‘partido general’. Esaki no ta enserá gastunan di e miembro riba lista individual o un grupo ku ta hasi kampaña pa un hende riba lista o algun persona.

Ta asumí ku lo tin hende ku ta traha gratuitamente durante e periodo. Esakinan ta hende riba lista, nan famia o amigunan. Pero, tin personanan tambe ku ta kobra pa yuda. A sali for di punto di bista ku mester di hende pa yuda banda di e miembro mes di partido ku ta riba lista.

Kon a buska informashon di esaki?

E metodologia ku e tim a usa tabata pa papia ku esnan ku tabata envolví den pasado ku organisashon di kampaña, ku tin bista i idea di e aspekto finansiero di esaki. E informashon ku a haña di esnan envolví a keda kombiná ku informashon risibí di preisnan riba merkado, por ehèmpel kuantu un sede lo ta kosta pa hür pa luna, kuantu un kampaña di propaganda via di televishon ta kosta, kuantu ta kosta pa por ‘boost’ un Facebook message, etc.

E informashon aki a keda usá pa traha un modelo ku ta kalkulá diferente senario. For di e senarionan a skohe e averahe di tur e gastunan i pa e kalkulashon a usa e siguiente kategorianan:

Komunikashon interno: esaki tin di aber ku e komunikashon den organisashon, ku miembronan, partisipante direkto, etc.

Komunikashon via di media: esaki tin di aber ku e komunikashon ku e mundu pafó di e partido via di radio, TV, media sosial, dor di kana den bario, etc.

Material: esaki ta enserá flyers, bandera chikí, bandera grandi, steker, billboards ets.

T-shirt: esaki ta enserá  T-shirt, poloshirt, kamisa, pèchi, etc.

Dia di elekshon: esaki ta enserá entre otro, personanan pa para na urna, ko’i kome i bebe pa nan, transporte pa e asistentenan

Organisashon di sede/‘manpower’: esaki ta enserá gastunan pa hür sede, koriente, kopia, hende pa traha den sede, etc.

Basá riba e informashon kolektá a yega na e siguiente kalkulashon di gastunan pa un partido polítiko na Kòrsou pa e próksimo elekshon na mart 2021:

Komunikashon interno 27.500

Komunikashon media  199.000

Material 100.500

Tshirt polo 62.500

Dia di elekshon 103.750

Organisashon sede/manpower 67.500

Definitivamente segun e tim por nota ku e kategorianan mas haltu ta Komunikashon Eksterno via di Media ku ta suma un promedio di ANG 199.000. E dos kategorianan ku ta sigui ta Material di propaganda i Organisashon riba dia di elekshon. Kada unu ta kosta mas o ménos ANG 100.000. E gastunan pa e otro kategorianan Komunikashon Interno, T-shirt i Organisashon na sede ta yega huntu na mas o ménos ANG 160.000.

Esaki ta nifiká ku pa un partido polítiko e gastunan promedio por suma un total di ANG 560.000. Pa partidonan ku ta hinka mas sèn den nan kampaña ku e partido averahe, a kalkulá ku e desviashon ta alrededor di entre 60% pa 70% mas haltu, ku ta pone un kampaña asin’aki yega te ku ANG 890.000 pa ANG 940.000. Pa un partido ku realmente ta invertí tiki den un kampaña e montante aki lo ta mas o ménos ANG 150.000.

Mester tene kuenta ku e miembro individual tambe ta hasi su propio kampaña ku normalmente por varia entre 1- 4% pa kada miembro riba lista. Si sali for di punto di bista ku ta 25 persona tin riba un lista, por kalkulá ku konhuntamente e miembronan individual ta hinka mas o ménos ANG 280.000 den un kampaña. Esaki ta pone ku por kalkulá ku e partido averahe ta hinka total komo partido i huntu ku esnan riba lista un total di ANG 840.000 den e kampaña benidero.

Ku esaki ICUC ta spera di duna un bista di kuantu un elekshon ta kosta. Esnan interesá por haña un bista di kuantu partidonan ta hinka den elekshon segun e relato entregá na Konseho Supremo Elektoral. Esaki ta algu ku nos no a analisá, pero lo ta interesante pa sa esaki.