Kaida dramátiko di entrada (90%) pa tráfiko aéreo

WILLEMSTAD.- Air Traffic Control di Kòrsou a registrá un kaida drástiko for di momentu ku e pandemia di COVID-19 a drenta Kòrsou i otro islanan di Karibe Ulandes. Dutch Caribbean Air Navigation Service Provider (DC-ANSP) ta papia asta di un kaida dramátiko, den sentido ku tin hopi ménos tráfiko. Tin luna kaminda e kaida a yega pèrdida enorme, anto ta masha poko DC-ANSP por hasi pa kontrarestá e situashon aki, esaki e direktor Micilia Albertus a konfirmá pa EXTRA.

E espasio aéreo ku ta bou di maneho di DC-ANSP ta amplio. Ta hopi avion ta trafiká den nos espasio aéreo sin ku nesesariamente nan ta baha na Kòrsou òf un di e otro islanan. Na e momentu ku e pandemia di COVID-19 a dal aden, práktikamente no tin masha tráfiko mas asina un investigashon di EXTRA a mustra.

Den kombersashon ku e direktor di DC-ANSP el a indiká ku e situashon ta dramátiko, den sentido ku DC-ANSP ta mira ku tin hopi ménos  tráfiko. Prinsipalmente e loke nan ta yama “overflight” kual ta e vuelonan ku no ta baha na niun di e islanan aki. Nan ta djis pasa den nos espasio aéreo pa bai Merka, Sur Amérika òf Oropa. E vuelonan ei a baha masha hopi mes. E avionnan ku ta bin Boneiru i Kòrsou tambe a baha, asta mas tantu ku “overflight”.

Boneiru ta esun ku a subi mas tantu na kantidat di tráfiko aéreo.

Kòrsou ta mas dependiente di vuelonan internashonal. Boneiru tin mas buelo interinsular. E parti ku semper tabata mas interesante pa e kompania lokal atendé kuné ta e tráfiko ku ta djis pasa den nos espasio aéreo. Esei a baha di forma drástiko i konsekuentemente e ta nifiká pèrdida enorme di entrada. Sra. Albertus a indiká ku den komparashon ku 2019 por nota ku den e periodo di aprel te ku yüni e sifranan ta motibu di hopi preokupashon. Den e lunanan menshoná a registrá kaida di 90%, despues 70 i tambe 80%. Den yüni e kaida a keda mesun drástiko i na yüli el a bira alrededor di 70%.

EXTRA a puntra kiko ta e opshonnan, kiko DC-ANSP por hasi pa kambia e direkshon aki i e direktor a splika ku pa subi entradanan no por hasi mashá. Kisas por pone preshon riba kompanianan di aviashon pa nan kumpli ku nan obligashonnan mas lihé, pero e punto ta ku esaki no ta un merkado ku por hasi merkadeo pa oumentá e kantidat di tráfiko. E fuente di entrada prinsipal ta vuelonan konosí komo “overflight”.  E situashon na Sur Amérika i Merka ta di tal forma ku no tin muchu tráfiko aéreo i tur pronóstiko ta mustra ku e situashon ei lo no bai kambia muchu lihé.

Lógikamente ku e islanan mes lo purba promové mas tráfiko aéreo, pero DC-ANSP mes lo no por hasi muchu kos. Ta bin aserka e kondishon ku gobièrnu a pone pa no surpasá e kantidat di 10 mil turista. Naturalmente DC-ANSP ta kòrta den gastunan te kaminda por. Por kòrta den gastunan, pero pa haña mas entrada ta keda un faktor hopi difísil. Kòrsou tin un skol speshal pa prepará kontroladónan di tráfiko, pero manera mundu ta aktualmente, ku ménos tráfiko aéreo, paisnan no ta haña ku ta nesesario pa sigui prepará mas kontroladó di tráfiko. Ta rònt mundu e demanda pa kurso di kontroladó di tráfiko aéreo a baha.

E industria di aviashon a haña un sla formal ku COVID. Paisnan grandi por a sobrebibí riba vuelonan interno, pero asta eseinan tambe a kai di forma drástiko. E pronóstikonan ta bira ora pa ora mas serio. Na e momentunan aki ta papiando di 2025 ku lo por bira un aña ku mundu ta mira kambio den direkshon positivo. Te ainda DC-ANSP por wanta e situashon, pero ta dependé kon largu e dura ku e kompania lo por sigui want’é, asina Micilia Albertus a splika EXTRA.