WILLEMSTAD. - Den e último dianan Kòrsou ta eksperensiando temperaturanan haltu ku ta yega 34°C i ta sinti kasi 40°C. Esaki tabata motibu ku Asosashon di Dòkternan di Kas a mira e nesesidat pa saka un komunikado pa splika kiko mester hasi ora un hende sinti ku e kalor ta afektando nan salú.

Ayera un biaha mas Servisio Meteorológiko mester a bolbe saka un boletin spesial esta ‘Kódigo Hel’ pa kalor eksesivo.

E loke ku por opservá tin vários sistema tropikal den moveshon, ounke niun no ta den laman Karibe. Tin dos sistema riba laman Atlántiko i dos ku pa algun dia ku nan a sali kosta di Afrika.

Tin un di e sistemanan ku tin 40% chèns di desaroyá den un sistema tropikal organisá i ku mester tene kuenta ku su direkshon.

Ainda ta prematuro pa indiká kua direkshon e sistema aki lo sigui, pero e sistema aki ta sòru pa basta áwaseru bos i welek, ounke ku e no ta organisá.

E sistema ta move poko poko direkshon wèst-nortwèst. Te na e momentunan aki niun di e sistemanan aki no ta un peliger pa Kòrsou, ounke mester sigui e sistema number 1 ku hopi atenshon.

Pa loke ta trata e tempu aktual, t’asina ku e pronóstiko di tempu pa Kòrsou i bisindario bálido te djaweps atardi 6 or ta por lo general parsialmente nublá, ku chèns pa áwaseru.

Temperatura máksimo lo alkansá 33ºC (por sinti 40°C) i temperatura mínimo 27ºC. Bientu lo ta generalmente ost i suak te moderá; forsa 2 te 4 (7 te 30 km/ora, 4 te 16 nudo). Durante áwaseru for di direkshon variá i posiblemente basta fuerte; forsa 5 (31 te 39 km/ora, 17 te 21 nudo).

Situashon general, durante próksimo  oranan ta  temporalmente nubianan lo oumentá riba nos region i okashoná áwaseru riba Kòrsou ku posibel welek ku bos.

Tambe, bientu lo supla ménos duru i asina fomentá un sintimentu di kalor durante dia.

Kondishon di laman ta generalmente trankil ku altura di ola di mas o ménos 1 meter (3 pia).

Perspektiva te djabièrnè atardi, ta parsialmente te hopi nublá ku algun áwaseru i posibel welek ku bos.