WILLEMSTAD,-  E kaso di asesinato i tiroteo ku a tuma lugá dia 25 di yanüari último dilanti Spoonz, a keda presentá den pro forma. E víktima Jeangianno Zimmerman (24) a bira e di 3 morto ku Kòrsou a registrá e dia ei , despues ku el a risibí un bala na altura di su kabes. Pa ku e kaso aki tin 3 sospechoso detené di kual Ministerio Públiko a deskribí kada un su ròl.

Ta trata di Celio Balentina, Frangelon Laker i David Statie di kual e último ta keda akusá di ta esun ku a asesiná Zimmerman. Balentina i Laker ta keda akusá di a los tirunan dirigí riba Statie. Mirando esaki Ministerio Públiko a akusá ámbos pa intento di asesinato riba Statie. Statie a pèrdè pia despues ku Laker a kita e arma outomátiko for di Balentina  i kaba e lachi riba dje.

Segun fiskal mas aleu, riba imágennan di kámara el a tuma nota kon Statie i un otro hòmber deskonosí a yega e diskoteka i a para e vehíkulo kasi den bògt.  Huntu nan a baha ku algun dama  pa bai drenta e diskoteka. Fiskal a bisa mas aleu ku despues e ta mira riba e imágennan kon e mesun  hòmbernan ta kana bai bèk outo i kue arma di kandela.

Segun fiskal e víktima Zimmerman ku tabata pará na su outo, a kue  un kùp ku e tabatin poné riba e dak di un vehíkulo i kana bai den direkshon di Statie i e hòmber deskonosí .

Fiskal a duna di konos’é ku Statie ta esun ku mes ora a los un bala dirigí riba Zimmerman, di kual e víktima a kai  abou mes ora i fayesé.

Segun fiskal, despues di esaki a surgi un tiroteo entre Balentina i Statie , di kual Balentina a risibí un bala den su lomba.

Fiskal a splika ku aki Laker ku tabata huntu ku Balentina  a kita e arma for di Balentina i kaba e lachi riba Statie ku a bai kai den Fokkerweg, pa motibu ku el a risibí bala .

Statie no a presentá den sala di korte djabièrnè últim , pa motibu ku un dia promé el a keda di dagfar.

Su abogado mr Vaders, ku si tabata presente, a duna di konos’é ku Statie no ta esun ku a los e tiru fatal riba Zimmerman.

Segun e abogado, Statie tabata huntu ku un hòmber kompletamente tapá.

E abogado a bisa ku na momento ku a surgi e tiroteo Statie a kuminsá kore i a saka su arma ora ku e tabata na altura di e 4 outo.

Segun e abogado, pues ta imposibel pa bisa ku ta su kliente ta esun ku a tira Zimmerman.

E abogado mirando esaki a pidi hues pa apsolvé Statie for di e asesinato.

Fiskal a pidi pa rechasá e petishon di e abogado, di kual hues a bai honra e petishon.

Segun hues esaki pa motibu ku e akusashonnan ta basta serio kontra Statie.

E kaso lo kontinuá dia 12 di sèptèmber binidero.