WILLEMSTAD.- Pa e plataforma di diálogo nashonal Kámara di Komersio a splika den un presentashon di Powerpoint kon kompleho ta pa kombatí pobresa bou di esnan ku ta trahando. A saka parti di e presentashon for di konteksto ora a informá friu asina ku Kámara di Komersio a proponé pa subi belasting di volúmen di benta Omzetbelasting OB ku mei porshento pa finansiá e oumento di suèldu mínimo.

Enfátikamente Kámara ke mustra ku e ta rekonosé ku tin grupo di trahadó i ku ta na nivel di suèldu mínimo i ku apénas nan por biba riba esei ku na famia. Ademas, pa hopi kompania bou di e sirkunstansianan aktual di un malestar ekonómiko ku ta perdurá ta difísil pa nan tene kabes riba awa.

Un oumento general lo kousa hopi daño, inkluso mas retiro i mas empresa ku ta sera. Hustamente pa aserká e problemátika aki na un manera responsabel den e diskushon ku e partnernan sosial (dunadó di trabou, sindikatonan i gobièrnu) Kámara di Komersio a investigá e problema preokupante ku e partnernan aktualmente ta lucha kuné. Den kuadro di e diskushon aki Kámara di Komersio a bin dilanti ku un alternativa tokante kon por aliviá spesialmente e famianan den e gremio di entradanan mas abou.

Ya ku sigur e pregunta ta subi mesa kon mester finansiá e gastunan adishonal, Kámara di Komersio na e kapítulo spesífiko ei a pone komo un di e hopi posibel opshonnan riba mesa pa oumentá OB ku mei porshento. Kámara di komersio no a lansa e oumento di OB komo proposishon, pero komo impulso pa e interkambio di idea den diálogo nashonal tokante finansiamentu di e alternativa pa e oumento di suèldu mínimo.

Pa esaki Kámara di Komersio a trese algun opshon di finansiamentu bou di atenshon. Su meta tabata pa demostrá ku kada opshon di finansiamentu tin un otro impakto riba empleo i forsa di kompra. Si a puntra Kámara di Komersio e lo por a duna un splikashon ku mester wak den un konteksto korekto i muchu mas amplio.