WILLEMSTAD – Kòrsou a lanta awe ku un pal’i áwaseru i mesora esaki ta trese kuné aksidente den tráfiko. Un di e aksidente nan aki awe mainta a tuma lugá riba Eyck van Voorthuyzenweg dilanti Coromoto College. Segun vershon inisial, dos outo tabata kore banda di otro i unu lo a pèrdè kontrol i dal den e otro. Konsekuentemente e Toyota pretu a bai dal den tur e barankanan ku tin riba e asera mei mei di kaya. E shofùr a resultá levemente herida i ambulans por a trat’e na e sitio mes. Vários di e barankanan grandi a resultá riba kaya. Bomberonan mester a akudí pa duna asistensia pa kita e baranka nan riba kaya i basha santu riba e zeta ku a keda atras.  Polis mester a sera e kaya temporalmente i warda kran yega pa kue e outo aksidentá ku a risibí hopi daño material. Di atenshon pa polis ta e echo ku esun ku a okashoná e aksidente mes a kore bai for di e sitio. Pa di malu di e shofùr ku a fuga tin kámara na e sitio ku a graba tur kos. Polis lo bai hasi e investigashon nesesario pa saka afó ta ken ta doño di e outo pa asina duna kuenta i rason.