Últimamente mayoria hende gara ku arma ta bent’e riba kualke defuntu

WILLEMSTAD.- E akusado G. Zimmerman (26) a keda kondená ayera na 18 luna di kual 9 kondishonal, pa poseshon di arma di kandela mas dos bala, dia 10 di yüni último.

Segun prosèsverbal di polis, riba e dia enkuestion personal di polis ku ta traha den e kamber di kámaranan di seguridat, a tuma nota di un hòmber sintá den su vehíkulo den Saliña na altura di un trùk di pan, ku un arma di kandela riba su skochi. Polis por a mira via di e kámaranan presis ku tabata trata di un arma di kandela.

Mes ora Sentral a dirigí un patruya ku a bai dirigí riba e vehíkulo ku e akusado tabata sintá aden i haña e arma abou pone, banda di porta ora ku nan a yega.

Tantu e akusado komo e amigu ku e tabata kuné den outo, a keda detené. Mas despues e amigu por a bai kas, pa motibu ku Zimmerman a atmití ku e arma ta di dje i ku e amigu no tin nada di aber ku esaki.

Riba e pregunta di wes na e akusado, kon bini e tabatin e arma huntu kuné i riba su skochi, el a konta ku el a sali ku e arma pa motibu ku un par di dia promé, el a traha na un klup komo bewaker i dor ku e no a laga un persona drenta ku arma, e hende a kuminsá menas’é.  Segun e akusado, el a bai kue e arma na kas di un hende ku ya no tei mas.  Wes na su turno a bisa e akusado, ku e no a lesa esei den e dosié i ku ta promé bia e ta tende bisa esaki. Tambe wes a bisa ku últimamente a bira un fenómeno ku mayoria hende ku keda gara ku arma, ta benta esaki riba kualke defuntu.

Dia ku el a keda detené el a deklará na polis ku e no a kumpra e arma, el a hañ’e benta abou na Caracasbaai. Banda di esaki, wes a puntr’e dikon e no a bai polis pa e hendenan ku ta menas’é, el a bisa ku el a yega di bai polis un bia kaba dia nan a ‘hack” su ‘”Face Book” i manda vários menasa p’e, pero polis no a hasi nada.

Segun e akusado, e dia di su detenshon e no kier a papia tur kos, pero despues di a papia ku su abogado, el a disidí di konta e istoria manera e kosnan a bai.

Fiskal a haña e akusashon probá abase di loke e akusado mes a deklará i tambe e arma ku a hañ’e kuné.

Relashona ku esakinan, fiskal a yega na un demanda di 18 luna di kual 6 kondishonal. Wes den su desishon a bai di akuerdo ku fiskal, pero wes a tene kuenta ku e akusado a atmití mes ora ku e arma ta di dje i tambe ku e ta “first Offnder”.  Tur esakinan ta pone ku wes a redusí e demanda i a kondená e akusado na 18 luna di kual 9 kondishonal.