Kambia Diet pa estilo di bida

Ta eksistí diferente tipo di diet, diferente forma di kome pa baha di peso pero tambe tin diferente produkto ku ta bende ora ta hasi ehersisio sea pa subi di peso, pa múskulo i hopi mas. Pero loke ta masha importante ora ta usa e tipo di produktonan aki ta e informashon i e guia ku tin di kana pareu. Djasabra a papia ku Alexander Wardekker, Strong Man i ku un konosementu amplio den suplemento. No ta asina asina ta bebe proteina. Alexander tei splika.

 

Strong man….

Alexander Wardekker ta hasi e deporte di strong men. El a splika ku aki ta trata di un deporte ku ta hisa kos pisá. Ta trèk outo, hisa piedra, trèk trùk grandi, ta un kos atlétiko pero na parti pisá. I pa a yega asina leu Alexander mester a kuminsá kome muchu mas ku loke e tabata kome. Den strong man mas pisá bo ta mas e peso ta subi. I ta einan ta yega lugá pa e suplemento i vitamina.

 

Suplemento pa yuda…

Suplemento no ta pa esun ku ke múskulo i subi di peso so pa un ke otro deporte, pero e ta tambe pa esun ku ke baha di peso. Tin diferente ku ta yuda bu baha i mester sa kiko ta kome. No por ta asina ku bo ta kome algu ku hopi kaloria i kere ku bo ta bebe un píldora i baha di peso. E no ta bai asina, segun Alexander a splika Djasabra. Ta un kombinashon di diet, bai gym i suplemento. Un suplemento tei pa yuda hende, i e ta pa tur hende den tur tipo di deporte.

 

Kome balansá….

Tur hende tin nan desayuno, almuerso i sena, esei ta e básiko di kuminda pa dia i mei mei di nan ta tira un snack. Por ehèmpel mainta por kome papa i webu, òf yogurt i fruta i almuerso mester ta algu fuerte i anochi ta saka e Carbs afó, no pasobra e ta malu pero e ta pisá pa e stoma. Por kombiná e bèrdura i piská por ehèmpel. I mei mei ta pone snacknan manera apel, yogurt, fruitbars. Si kome asina e motor di kurpa ta kuminsá drei.

 

Ehersisio….

 ‘Zowiezo’ mester kombiná esakinan ku ehersisio. E ta rekomendá hende ku no ta hasiendo nada pa a lo ménos kuminsá kana 3 biaha pa siman. I ora e training ta aden ta kuminsá papia di suplemento esta pa tira algu aden pa por baha mas lihé.

 

Fásil baha di peso….

Bahamentu di peso segun Alexander ta algu hopi fásil. Hopi hende ta kere e ta difísil. Tur hende mester kome sierto kantidat di kaloria pa dia. Si ta 2 mil kaloria ta bo máksimo, i si bo kome 2 mil pa dia bo ta keda na e 100 kilo ei pero si bah’é na 1500 kaloria lo bo baha sigur. I si bo ke subi kome 3 mil kaloria. Pero si kombin’é ku gym i bo ta kome 2 mil kaloria, den gym kima 300 kaloria, tambe bo ta baha. E ta algu basta fásil. I aki e no ta referí na diet pa kome aros seku i galiña seku. E diet mester ta dushi, por traha algu dushi i salú.

 

Vitamina D….

Alexander ta bon konosí ku suplementonan i e ta haña ku no tur hende sa kon pa usa suplemento. I esei ta loke e ta hasi esta informá hende kiko por usa pa subi, baha di peso òf ora tin problema ku preshon i nir. Tin hopi suplemento ku por usa. Meskos ta konta pa vitamina. Mayoria suplemento ta bin ku vitamina den dje pero no e kantidat ku bo mester. Por ehèmpel vitamina D mester ta un kantidat bon den kurpa pa e ta bon. Vitamina D ta den hopi kuminda pero nos komementu na Kòrsou ta asina for di sla ku bo no ta haña sufisiente vitamina D. I ounke bo ta haña vitamina D di solo, na Kòrsou nos ta skonde pa e solo i no ta gosa di e vitamina D ku e ta duna.

 

Vitamina D, segun Alexander ta masha importante pasobra e tin di aber kon kurpa ta apsorbá sierto ‘stoffen’ i apsorbá sierto kuminda. E ta hasi hopi kos ku ta laga e hende sintié mas dushi. Defisiensia di vitamina D por laga e hende sintié malu. E ta hasi strong man i ta lesa hopi buki i promé kos ku ta papia di dje ta vitamina D. Mester chèk pa esei ta bon. Den su kaso ora el a bai chèk su vitamina D na prinsipio esaki tabata bou di e averahe ku e mester ta i el a buska e suplementonan ku vitamina D i asina su nivel di vitamina D a subi. I asina mes no a yega kaminda e mester ta.

 

Tur diet ta oké…

Alexander a bisa ku tur diet ta oké, e diet mester ta algu ku e hende por siguié. Tin e dietnan di hopi vèt i si bo ta bai kuné, anto hasié. Mas bien mester kita e palabra diet i hasié un estilo di bida. Tin hende ta bai diet di 6 luna, pa baha 30 kilo i despues ta subi bèk e 30 kilo mas 5 aserka. Hopi hende na yanüari ta kuminsá ku diet i baha i desèmber ta subié bèk. Miéntras hasi bo estilo di bida i e kambionan ta bira algu tur dia i bo no ta sufriendo di e diet òf di e gym. E hende tin di gosa di su kambio i su estilo di bida.

 

Bai gym fòrsá, hasié siendo bo no ta gust’é lo no yuda. Si e hende no ta gusta gym, e por skohe pa bai kana, kore baiskel, hunga un ke otro deporte pero e moveshon ta esun importante. Bai landa kualke kos pero move pa kima kaloria.

 

Konseho…..

Alexander ta duna konseho den forma di kome i suplementonan ku por usa. E tin un página riba FB ku yama Cura Fit & strong i Cura fit strong riba Instagram. E ta un página ku el a kuminsá pa motivá hende. E ta pone artíkulonan riba vitamina i suplemento. E ta pone kua e mes personalmente ta gusta usa. I riba e página por manda mensahe pa Alexander i e ta yuda.

 

E mes ta den gym tur dia mitar di 5 di mardugá i asina su dia ta kuminsá. E aña aki el a wanta ku strong man, pero pa 2020 e lo ta bèk den dje. I tin hende muhé tambe den e deporte aki pero e no ta algu asina konosí pa hende muhé. E strong man mes ta un grupo masha chikí di hende ku ta hasié.

 

Kome dushi pero moderá…

Gosa di bida pasobra ta un tin, gosa di e kos dushinan pero di forma moderá. I pa yanüari 2020 bo ta drenta den gym. No solamente e kurpa pero e paden tambe.

 

SHARE

LEAVE A REPLY