WILLEMSTAD.- Pa un tempu kaba okupashon di hotèl ta basta abou i tambe turismo en general na Kòrsou ta hopi ketu. Tambe pa tur e hendenan ku a pèrdè trabou ku resultado ku miles di famia na Kòrsou ta biba bou di e liña di pobresa i mester lucha diariamente pa pone pan riba mesa. Tur atenshon ta bai último lunanan na pre-elekshon i elekshon di 19 di mart i promé ku esei tur atenshon tabata bai na e blackout, NOW-regeling i otro difikultatnan.

Hans Slier na nòmber di Chata i tur empleado den e sektor hotelero ta bisa ku mientrastantu ta parse ku e atenshon general a desviá for di e echo ku turismo a kai for di dia na Ulanda e lockdown mas severo a kuminsá  i ku esei e pilar di mas importante di nos ekonomia.

Tur hotèl i akomodashonnan ta sufri enormemente, okupashon ta entre 0 pa 20%, reservanan finansiero ta serka di kaba despues di 11 luna i mayoria hotèl tin'é hopi difísil. E sosten finansiero ku hotèlnan ta haña di gobièrnu, no ta kubri ni 30% di e gastunan total di un hotèl. Pa empleadonan no tin trabou na bista te por lo ménos di dos mitar di 2021. Pues gobièrnu tambe lo risibí ménos impuesto i lo ta kompletu dependiente di finansiamentu di Reino. Ku esaki nos no ta papia solamente di hotèlnan, pero tambe otro kompanianan manera restorant, beach clubs, taksi, kompania di hür outo, skolnan di buseo, kompanianan ku ta organisá tour, labanderianan, i defakto tur nan klientenan te na bankonan i asta kompanianan di seguro.

Sr Slier ta bisa pa laga nos mantené nos wowo habrí i fihá riba loke nos por hasi pa Kòrsou su turismo por bolbe drai. Nos gobièrnu i tambe dr. Gerstenbluth, i e pueblo di Kòrsou en general, a hasi nan máksimo esfuerso pa baha e sifranan di COVID i mantené nan abou i pronto nos lo kuminsá ku vakunashon kaminda ku pa promé di yüni 2021 e gran mayoria di nos poblashon lo por ta vakuná. Pero si nos ke tin un ekonomia ainda pa e tempu ei, nos mester tuma akshon AWOR, paso sin ekonomia gobièrnu tampoko por sigui ehersé su trabounan den e.o edukashon, kuido, seguridat etc.

Manera sa, di aña pasá yüli, ta dura 5 pa 6 luna despues di habri frontera, pa okupashon ta un tiki na nivel atrobe. (Si nos habri awor akí, esaki lo ta pues te sèptèmber 2021.) P'esei CHATA, huntu ku stakeholders, ta proponé pa boga na gobièrnu Ulandes pa kambia Kòrsou bèk pa kódigo hel entrante promé di mart 2021. Asina bishitantenan por biaha pa Kòrsou sigur i sigurá ku un pakete di biahe. Chata ta boga pa un tráfiko aéreo sigur i kontrolá entre Kòrsou i Amsterdam i Miami i New York. Esaki ta enserá ku biaheronan ta keda di tèst promé ku nan subi avion pa Kòrsou pero tambe promé ku nan subi avion pa bai nan pais bèk. Ku e téknikanan aktual i tèstnan rápido, esaki por keda reglá fásilmente, di un forma sigur i lihé. Esei, kombiná ku e echo ku (pa e tempu ei) un porsentahe supstansial di hende lo ta vakuná i tambe alrededor di 20% di poblashon lo a haña e vírus kaba, ta hasi posibel pa Kòrsou re-stabilisá su ekonomia i ku esaki oportunidat pa trabou i tambe kaha di gobièrnu.

Na nòmber di CHATA, tur empleado den turismo i kompanianan aliá, nan ta hasi un petishon na gobièrnu pa hasi tur loke ta posibel pa realisá e tráfiko aéreo ariba menshoná posibel huntu ku Premier Rutte i gobièrnu Ulandes.

https://extra.cw/asosashon-di-restorant-di-akuerdo-ku-chata-bin-ku-kodigo-hel/