Análisis;

WILLEMSTAD.- Miéntras e siman aki nos a drenta e diana krusial pa elekshon 2025, parse ku tur hende a pone un banda ku fin di luna aki ta pasa over di e florin ANG pa e florin karibense XCG. Kiko esaki lo nifiká, e lo ta un káos òf oportunidat.  EXTRA a papia ku vários persona for di e sektor finansiero i tambe for di e sektor empresarial. Nos a sinti e tenshon pa loke nan ta ferwaktu na kaminda.

Ta un kambio históriko ku ta djis den porta;  kambio di e florin ANG i introdukshon di e florin karibense XCG.Kiko e lo nifiká konkretamente pa negoshinan, konsumidónan i pa ekonomia di nos pais. E traspaso ta interesante pero alabes e lo ta un periodo di desafio kaminda problemanan práktiko, efektonan ekonómiko i asta práktikanan ilegal di kambio di sèn por ta djis tras di porta.

Kasa i filanan largu

Riba nos isla kaminda pa 60% e transakshonnan ta sosodé ku sèn kèsh,e  kambio pa XCG lo no ta un kuestion simpel di e biyetenan nobo apesar ku e ta 1 riba 1. E tiendanan lo tin di aber ku nan lachinan di kasa yen, pasobra banda di e florin bieu tantu papel komo monedanan., tambe nan mester tin lugá pa pone e biyetenan di XCG di 200 i 20 florin (ku no tabata eksistí serka e florin bieu) pero tambe monedanan di 50 i 20 sèn. Loke EXTRA por a komprondé serka algun komersiante ku nos a bishita, nan lo tin lugá den nan lachinan di kasa pa e tipo di biyetenan ei i ku tur e monedanan. Esaki lo por sòru pa filanan largu na kasa i sigur lo por kousa frustrashon serka e konsumidó i serka e komersiante mes.

Ta bin aserka ora e kliente ke paga ku e sèn bieu pero e negoshi no tin sufisiente sèn di e florin nobo pa duna bèk. Segun e ekspertonan finansiero ku nos a papia kuné, esaki ta algu ku por a mira kaba na paisnan oropeo ora e kambia pa euro.

Sèn di kambio

Serka otro paisnan ku kambio di e moneda a konosé e práktika informashon di kambio. Esaki lo por sosodé na Kòrsou tambe; algun tienda, enpartikular esnan ku un ret komersial internashonal manera chines, hindú i arabirnan, lo por aseptá e florin bieu pa tempu mas largu, pero kontra di un tarifa di por ehèmpel 5%. Esaki ta algu ku a sosodé anteriormente den otro paisnan manera Venezuela i Turkia na momentu di kambio di moneda. Por ehèmpel den barionan kaminda  komersio ta floresé, por haña empresarionan ta probechá di e kambio aki, tuma e florin bieu mas abou i bai kambi’e na banko pa nan hasi ganashi. Esaki na su turno por sòru pa sierto tenshon ekonómiko entre gruponan den komunidat.

Komersiantenan, enpartikular esnan chikí ta poko preokupá ku nan por haña nan konfrontá ku gastunan èkstra na banko na momentu ku nan bai kambia e florinnan bieu. Tin empresario chikí asta tin informashonnan ku bankonan lo ke kobra un tarifa pa hasi e kambio. Si esaki ta asina, e lo trese kuné, segun e empresarionan, ku nan lo bai nenga di tuma e florin bieu i ta bai kompletamente over na e XCG apesar di e periodo di transishon.

Posibel solushon

Segun nos análisis, a base di e informashon di ekspertonan finansiero, por laga e periodo di transishon aki kana mas mihó tumando diferente medida ku otro paisnan tambe a apliká. Nos por menshoná biyetenan komo ehèmpel “specimen” pa asina  e negoshinan por kuminsá kustumbrá ku e papel, su format i tambe e pueblo por kuminsá kustumbrá ku esaki. Organisá training pa kaheranan, pero mas serka den nan bario i no na Banko Sentral manera el a sosodé kaba. Por trese gruponan chikí di kahera huntu i treinnan mas serka di nan bario posibel. Nan trabou por duna nan algun ora liber, trahando grupo grupo pa por bai haña e informashonnan nesesario i no den nan ora liber, ya ku hopi tin yu na kas òf nan grandinan pa atendé kuné.

Tambe mester sòru pa e periodo di aseptashon di e florin bieu ta unu obligatorio i ku MEO ta kontrolá esaki pa e empresario no nenga e sèn riba su mes. Tambe por mar’e na un but i asina por evitá ku e konsumidó ta hañ’e ku e sèn bieu sin niun kaminda di por bai ku esaki.

I bankonan na nan turno tambe entre 31 di mart i 30 di yüni por duna servisio di kambio grátis pa no bin reperkushonnan finansiero. Na Ulanda i na Alemania esaki a sosodé na momentu di introdukshon di e euro.

E próksimo lunanan ta bira unu krusial. Pasa di e florin bieu pa esun nobo lo sosodé organisá? Esei lo mester keda bon planiá. Un kos ta sigur, e forma ku empresarionan, bankonan i gobièrnu ta atendé ku kambionan históriko, lo ta determinante pa e klima ekonómiko di nos futuro.

Banko nashonal

I un biaha mas nos tin di mustra riba e banko nashonal ku diferente eksperto finansiero ta haña ku lo por ta e solushon pa diferente problema aktualmente. Aktividatnan ekonómiko legal ku no por haña un kuenta di banko manera riferonan, bendedónan chikí di outo, hoyerianan, esnan ku ta lora man na kas ets. E grupo aki por haña nan pusha den práktika ilegal pa nan por deshasí di e plaka ya ku di e forma legal e no ta bai. I nan mester di un lugá i den e kaso aki un banko nashonal kaminda si nan por habri un kuenta pa depositá nan plaka legal. Dos siman pasa nos a skibi kaba di e periodo di amnistia pa asina pro baha e pániko innesesario i tambe e preshon den e sirkuito di plaka kèsh.