WILLEMSTAD.- Durante añanan ku a pasa akta di nasementu di beibinan ku a nase sin bida ta keda entregá sin e nòmber di e beibi. Riba e akta ta hasi simplemente menshon di e beibi. Na febrüari 2020, huntu ku mayornan di Imani a hiba un lucha den korte pa trese un kambio na esaki. Esaki tabata un proseso bastante emoshonal i apesar di e bon informashon ku e pareha Van Wilgen a risibí na Kranshi i ofisina di Korte Komun tòg un poko kompliká.

Dia 5 di mart próksimo ta hasi nèt un aña di e veredikto ku a logra di trese un kambio riba e akta di nasementu sin bida, pa asina Imani, su nòmber di forma ofishal por keda agregá na e akta. Esaki a trese den e último lunanan un pas pa e mayornan i tambe un sentido di rekonosementu pa nan beibi Imani.

Tin mas mayor ku a pasa den e mesun situashon i huntu kier duna tur mayor e oportunidat pa hasi e kambio aki i di un forma ofishal registrá e nòmber di nan beibinan riba e akta di nasementu sin bida. Esaki por aktualmente solamente pa medio di un kaso den korte.  Por hasi esaki den UN kaso grandi ku tur mayor envolví, pa asina fasilitá e proseso aki pa hopi mayor.

Pa e motibu aki, lo organisá un dia di registrashon pa tur mayor ku ta deseá pa hasi e kambio riba nan akta. Riba 20 di febrüari próksimo, entre 16.00 pa 19.00 p.m., na Sentro di bario Otrobanda ta invitá tur mayor ku lo ta deseá pa registrá. Pa mas informashon por tuma yama e telefòn 518-8181.