WILLEMSTAD.- Vários hende a keda hopi impreshoná pa wak kon kuater barku krusero grandi a para kasi den porta di haf di Kòrsou ayera den oranan di dia pa basta ratu. EXTRA tabata den kontakto ku Curaçao Port Authorities su bosero Sau Bridgewater-Chong kende a splika ku ayera a tuma lugá kambio di personal riba 7 barku krusero. Ta trata di un kambio ku a enserá ku 58 miembro di e personal di e barkunan a probechá pa bai nan pais bèk, miéntras un tim nobo a bin remplasá nan.
E kuater barkunan den boka di haf tabata di Holland America line. A hasi uso di e botonan di Kompania di Tou Kòrsou (KTK) pa hasi e kambio di personal riba laman.
Esnan ku a paga bon tinu por a mira e barkunan Eurodam, Oosterdam i tambe Nieuw Amsterdam. Seabourn Sojourn ta otro di e barkunan na Kòrsou. Na Megapier 1 i 2 tambe tin barku i meskos na Caracasbaai.