Minister Cooper: Mester aktua na bienestar di e kresementu den turismo

WILLEMSTAD.-Aktualmente tin un kambio di lei na departamento Wetgeving & Juridischezaken (WJZ) ku ta trata ampliashon di e kantidat di taksi na Kòrsou. Despues di WJZ e proyekto di lei aki lo bai pa Raad van Advies pa konseho, esei Charles Cooper minister enkargá ku Tráfiko, Transporte i Planifikashon Urbano a duna di konosé na EXTRA kontestando e pregunta si gobièrnu ta eksplorando e ampliashon di kantidat di taksi.

Ta un echo ku turismo ta kresiendo i esei ta motibu ku tin momentunan ku turistanan no ta haña taksi pa transporte di un sitio pa otro. Tantu Banko Sentral komo otro institutonan i esnan den e industria ta ripará esei. E informashon inisial ku a yega mesa di redakshon di EXTRA ta indiká ku lo bai introdusí un sistema ku 4 vehíkulo por operá di kada pèrmit nobo pa taksi. Di e forma aki ta amplia e kantidat di taksinan eksistente. EXTRA a puntra e minister si esaki lo nifiká ku mas hende lo por bini na remarke pa haña un pèrmit òf mester keda ku e sistema di ‘hulp chauffeur”?

Minister Cooper a splika EXTRA ku tin un kambio di lei na kaminda pa hasi esei posibel. Pues ku ta amplia e kantidat di taksi. E sistema nobo ta permití e posibilidat pa lanta kompanianan di taksi. Esei ta enserá ku taksistanan aktualmente por bira kompanianan ku ta operá taksi. Riba e pregunta ku kuantu taksi lo oumentá sr. Cooper a bisa ku esei ta dependé kuantu e merkado tin mester, i kuantu kada un kompania por karga te un máksimo pa kada kompania.

E mandatario a indiká ku el a papia ku tur stakeholder. E no ke sigui papia so, e minister ta kere ku a yega momentu pa aktua na bienestar di kresementu ku Kòrsou ta eksperensiando den sektor di turismo. E meta ta pa brinda mihó servisio. E kambio di lei ta na WJZ aktualmente.

EXTRA a papia ku taksista i organisashon di taksi riba e desaroyo aki. E taksista a bisa ku el a tende minister Cooper papia di e plan, pero e no sa kiko ta e intenshon real. ‘Kisas tin mester di mas taksi pa sierto momentu òf temporada, pero no ta asina ku hinter aña tin mester di mas taksi.”

Pa e organisashon di taksi a importante pa tin bon kla kiko ta e intenshon pasobra ni barkunan krusero no ta duna rendimentu mas, pues oumentu di kantidat di taksi ta algu ku mester pensa bon. Kisas 10 òf 15 taksi èkstra sigur lo yuda, pero 50 taksi èkstra si ta pone ku despues niun no por sobrebibí.

Manera indiká ariba, minister Cooper a splika ku e kambio di lei ta na WJZ i pa despues e bai Raad van Advies ku ta e órgano di konsulta mayó.