WILLEMSTAD.- Mañan djabièrnè 3 i djasabra 4 di mei entre 6:30’or te 12:00’or di mainta algun kaminda den Punda lo ta temporalmente será. Esaki den kuadro di preparashon i e seremonia pa konmemorá esnan ku a pèrdè nan bida durante temporada di guera, mishonnan di pas di organisashonnan internashonal òf na man di teroristanan.

Te ku 12:00’or di mainta òf te despues di final di e ehersisio, polis ta sera kaminda pa Marina Real i demas gruponan por hasi algun ensayo pa e preparashon (3 di mei) i realisashon di e seremonia riba 4 di mei. Tur dos dia kaminda lo ta será for di ofisina Citco na De Ruyterkade te ku parada di bùs na Punda’. Polis ta desviá tráfiko pa Punda via Nieuwesraat den Pietermaai. Outonan ku ta sali for di Punda mester sigui instrukshonnan di tráfiko duná pa Polis.

E parada di bùs na Punda (Waaigatplein) ta muda temporalmente riba i dia i orario menshoná. Transporte públiko (bùsnan chikí i bùsnan di A.B.C. busbedrijf) lo bai hasi uso di Ansinghstraat komo parada di bùs final i sigui nan ruta pa Johan van Walbeeckplein.

Promé i durante di e ehersisio i/o e seremonia menshoná, e parada di bùs i konvoi na Roodeweg (Otrobanda) na altura di Santana Militar lo kaduká.

Ministerio di Hustisia lo publiká un Dekreto Ministerial ku tur spesifikashon tokante e kambionan temporal di tráfiko menshoná den e komunikado aki.

Gobièrnu ta pidi pa tene kuenta i komprenshon ku kambionan i ta invitá tur hende ku ta interesá pa akudí na e seremonia.