Minister Larmonie-Cecilia luchando pa gara otro ‘piska’ grandi

WILLEMSTAD.-Ruthmilda Larmonie-Cecilia, minister enkargá ku SOAW i temporalmente tambe ku Desaroyo Ekonómiko no ta goberná riba Facebook. E ta lamentá ku un kambio entre personal di un servisio pa otro mester a haña un buèlta diferente i asta fèrfelu. E echo ku sra. Ersilia de Lannooy ta kambia di ministerio di Finansa pa ministerio di SOAW ta algu ku minister Larmonie-Cecilia i sra. de Lannooy ta papiando pa dos siman kaba, pues no ta nada nobo, asina e minister a deklará na EXTRA.

Manera EXTRA a informa for di djasabra último, hopi hende a kuminsá puntra si tin problema entre partidonan di koalishon MFK i PNP debí ku por a tuma nota di un publikashon di minister di finansa Silvania riba Facebook(FB) ku ta indiká ku a kambia e Sekretario General di Finansa pa esun di MEO i ku esaki lo a sosodé via app i no personal.

Den deklarashon na EXTRA e lider polítiko di PNP a splika ku for di momentu ku e gobièrnu nobo a drenta e SG interino di Finansa a aserka su persona indikando ku e situashon na ministerio di finansa lo no ta na su smak. Larmonie-Cecilia mesora a probechá i puntra sra de Lannooy si e no kai bai yud’e na SOAW. Sra. de Lannooy na su turno a aseptá mesora i asina a kuminsá hasi e preparashonnan. Na reunion di Konseho di Minister minister Silvania a proponé a hasi kambio di SG den sentido ku sra. Mook di MEO ta bai Finansa i de Lannooy ta bai MEO. Riba esei minister Larmonie-Cecilia a indiká ku nèt e tambe tabata bini ku un proposishon pa sra de Lannooy bai SOAW.

Pues e asuntu aki tabata kanando algun siman kaba i p’esei ta masha di lamentá ku riba ret sosial e kos mester bira un bochincha di e taya ei. Larmonie-Cecilia a enfatisá ku no tin niun asuntu ku minister di MFK a kore ku hende di Nashonal. Asta ta asina ku minister Larmonie-Cecilia ta hasiendo esfuerso grandi pa logra konvensé un otro ‘big’ fish’ pa SOAW. Ministerio SOAW tin hopi mester di hendenan ku konosé finansa publiko bon i p’esei ta nesesario pa buska mas profeshonal riba e tereno ei. Pa Larmonie-Cecilia sra. Zus de Lannooy ta un bon profeshonal i esei ta loke Kòrsou tin mester di dje awor aki. Den SOAW tin basta aspekto ku meresé maneho finansiero al dia. ‘Mimi no ta goberná via Facebook, pues si un kolega minister ta na altura di un situashon den su ministerio e ta pidi pa hisa telefòn i yam’e pa asina e por aktua. No bai skibi riba FB.