Achi Jansen i Cynthia Ortega a splika; Na Ulanda

WILLEMSTAD.- Kampaña di informashon "Valpreventie" na papiamentu spesial pa nos hendenan di edat bibá na Hulanda. Achi Jansen, embahador Valpreventie a duna EXTRA Ulanda un splikashon di e kampaña aki. Achi Jansen a bisa ku nan ta duna informashon pa konsientisá e grandinan.

Valpreventie ta pa hende di 65 bai ariba i ta konsientisá nan riba e peliger ku tin pa ku kaimentu. Kada 5 minüt tin un hende ta bai emergensia pasobra el a kai. Esaki ta hopi i p’esei e kampaña pa e hendenan. Munisipionan ke pa e hendenan biba mas tantu posibel riba nan mes, den nan kas i pa esei nan kas mester ta seif.

Valpreventie ta sali for di e munisipionan i tur tin e kampaña aki. E valpreventie ta nifiká prevenshon pa hende kai. E hende por kai den kas òf pafó di kas i p’esei ta tene kuenta ku faktornan personal i alrededor. Esun personal ta trapi, kabel, no hopi kos den kas, sapatu mester ta bon na pia. No bisti slòf ku por laga bo kai fásil. I rondó ta por ehèmpel tegelnan instabil, ‘rolator’ etc.

Mas grandi bo bira, mas grandi bo chèns di kai ta i esei ta pasobra bo spir masa ta bira mas suak, bo balansa no ta bon i mester wak komementu. E kurpa mester di kalsio i vitamina. Ta bon pa puntra dòkter òf botika pa mira ku loke bo ta kome ta bon. Kòrda wak brel i sòru pa esaki ta limpi. No pone hopi kos den kas pa bo por trompeká.

Kaimentu ta mas peligroso si bo ta biba bo so. Si ta bo so ta biba i bo kai i no por lanta ta un problema.

Tur hende grandi sa di e kosnan pero nan no ta mira e peliger di dje. E grandi por kai, frakturá hep i ta bai hospital i despues sentro di revalidashon i despues no por bai su kas mas. Kai ta algu diripiente i inboluntario. P’esei mester wak pa e sosodé ménos i p’esei ta duna tepnan segun Achi Jansen.

Mester wak baño pasobra e ta muha. Wak pa tin tapeit antislep. Si bo tin problema di para, wak stul i mannan pa por tene na dje. Ora ta bai tualèt anochi wak pa tin un tiki lus pa por kana. ‘Rolator’ tambe ta peligroso pasobra e hende ta drei esaki pa sinta riba dje i por lubidá di pone e brek i bo por kai.

Prevenshon ta masha importante pasobra si bo kai bo ta fraktura bo kurpa malamente. Ta bon pa chèk na munisipio pa por tin un alarma pa si bo kai i bo no por lanta, ku tòg bo por alarmá otro hende. Tur munisipio tin konsehero di hende grandi ku por papia kuné. Achi Jansen a sigui bisa ku próksimo enkuentro ta dia 12 di yüli na Tilburg di 3or pa 4or di atardi.

Cynthia Ortega Koordinadó general Val Preventie (OCAN) tambe a duna un splikashon di e prevenshon pa kai. E kampaña yama “Ik sta sterk” i e kampaña segun Cynthia Ortega di OCAN, ta unu ku ministerio di VWS a bin kuné pasobra nan a ripará ku hopi hende grandi, esnan riba 65 aña bai ariba ta kai. Hopi hende ulandes karibense no por logra yega na nan ku kampaña. Pa hopi kampaña di e ministerio, ta pidi OCAN pa bin ku un kampaña adishonal pa asina por yega na nos hendenan.

E problema ta serka hopi grandi pasobra un bia den 5 minüt un hende ta yega emergensia, ku ta 112 mil hende pa aña. I mas grandi bo bira mas haltu e ta bira. Por mira awor aki ku 65 aña i mas ta 3% ta bai emergensia i ora e yega 75 aña ta 50% i ora ta 85 ta 60%. Mas grandi e hende bira, e riesgo pa e kai ta bira mas grandi.

E chèns pa rekuperashon tambe segun Ortega ta chikí, pasobra ora bo bira grandi bo wesunan ta bira mas bròs i e tin di kura di su mes i pa hende grandi e ta bira problema grandi. E ta trese kuné ku kisas bo no por biba mas na bo mes kas i ta kita un hende su bibienda.

Esaki por prevení i p’esei e kampaña prevení pa no kai. Por haña den e kampaña akí kon ta trein, tepnan ku ta duna e hendenan i ta duna informashon kiko e hende por hasi ku e por kai.  Cynthia mes a ripará ku mas grandi bo bira bo no ta hisa pia bon i ta kai mas lihé. E kampaña ta konsientisá e hendenan tambe pa bai munisipio i hasi un tèst. E tèst ta duna un indikashon kiko e rísikonan ta pa e hende ei.

E informashonnan ei ta aksesibel na tur munisipio. Spesialmente e munisipionan ku tin mas konsentrashon di nos hendenan i einan por hasi e tèst i dependé e resultado por haña akseso pa un entrenamentu.

OCAN ta dunando informashon na papiamentu i nan ta sòru pa diferente enkuentro ku e diferente embahadornan. Awor akí ta bai tin unu na Tilburg, ta bai tin na diferente otro siudat mas, enpartikular kaminda e hendenan ke e informashonnan.