WILLEMSTAD.-Piskadónan di e área di BandaBou su kana a kuminsá yena. Nan a kuminsá kansa ku apesar di tantu reklamo ku nan a entrega riba e forma ku marina real ta aktua, tòg no tin ni un reakshon na tinu di gobièrnu, ni Parlamento.

E grupo a bai Fòrti, kargando un nèt di piskadó hopi grandi. Dilanti palasio di gobernador polis a pidi nan pa no kologá e nèt na e palunan. Despues di esei nan a kana bai edifisio di Parlamento sperando ku nan l por a haña atenshon di presidente di e kolegio i otro miembronan.

E problema ta ku marina ta train den e área di Wakawa i ta tira usando arma di kandela fuerte. Piskadónan ta bisa ku nan bida ta kore peliger debí na e tiramentu aki. Nan ta hura ku nan a topa piska ku bala. E situashon ta unu fèrfelu, pero ta parse ku mandatarionan lokal no ta logrando pa yega na un solushon.

Piskadónan di rònt Kòrsou a uni forsa i a yega na un resolushon siman pasa. For di esaki a yega na un resolushon i a formulá un karta ku nan ta entregá na e presidente di Parlamento. E presidente a risibi e karta i a bisa ku lo hasi su bèst pa trat’e den reunion di Parlamento. E presidente di Parlamento a proponé pa buska kontakto ku representante di Hulanda ku ta sr. Arkenhout.  Nan a menshoná e intenshon di bai serka promé minister tambe. Mas detaye den edishon di EXTRA.