WILLEMSTAD.- Kanamentu riba kaya a bira praktikamente imposibel. E medidanan ku gobienru a introdusí ta bisa ku por hasi deporte den i rondó di bo bario. Tin hende ke bai kana den nan bario pa hasi ehersisio pero esaki ta praktikamente imposibel. Tin mas kachó ta kana riba kaya ku tin hende.

Esaki ta e konklushon ku nos a yega na dje, despues ku djadumingu pasa un señora ku su yu a bai kana den Suffisant. El a yega den área di e ofisina di deporte SDDK i ta un skol di kachó a top’e. El a lora i subi Rio Canarioweg i kana bai direkshon di Suffisantweg. El a keda kana ku e yu di un banda di kaminda pa e otro. Kaminda tabatin kachó na un banda e ta krusa bai e otro banda, i asina el a sigui. E señora a disidí di lora rondó di stadion di Suffisant i einan un trupa di kachó a bin riba dje i su yu. Nan a kore drenta roi Sali e otro banda pa skapa di e animalnan. I ta asina ke pa hasi deporte den bario mes.

I esaki ta un kaso. Un mener a bai kana ku su yu di 3 aña den Periclesstraat i kachó a atakanan. Pa e skapa su yu, el a haña morde di kachó.

EXTRA a komprondé ku den Emmastad ta na trupa e animalnan ta kana rònt. Den área di Skèrpènè e kachónan ta skonde den mondi i ora hóbennan di bario bai hunga bala, nan ta Sali i ataka nan.

Den Otrobanda, den serkania di e bushalte Parris, einan ta dominá pa kachónan basta brabu.

E animalnan aki niun ta interesá pa buska un kas pa biba pasobra nan ta bon kuida. Ulandesnan enpartikular ta sòru pa e kachónan riba kaya haña kuminda. I esaki ta hasi e situashon aun mas difísil pa kita e animalnan for di kaya, pasobra nan ta bon kuida i bon kome.

Tin un lei di bienestar di animal ku a keda aseptá resientemente den parlamentu pero kon e lo bai funshoná ta un misterio.

EXTRA a papia ku Stanley Ignacio, hòmber di animal i e tambe ke sa kon e lei lo bai funshoná. Ken lo bai kontrolá i lo bai tin sanshon?

Ta konosí ku Dierenbescherming no tin sèn; gobièrnu lo duna nan sèn pa nan por manehá e situashon di bienestar di animal.

I e bienestar di animal ta kuminsá for di e molèster ku e animal ta kousa riba kaya. Kon lo bai atendé ku tantísimo kachó ku ta kana los, esaki ta interesante pa sa. Pero e ta urgente, manera Stanley Ignacio a bisa EXTRA. Mester atendé kue  animalnan i atendé ku e kriadónan di animal, hendenan ku nan kura no ta bon sera, i ku tòg e animal ta subi kaya i forma un peliger i molèster pa hende.