WILLEMSTAD.- Djadumingu den oranan trempan di mainta a drenta e informashon ku lo mester tin un kandela feros riba tereno di Refineria Isla.

Informashon ku EXTRA ta disponé di dje, ta indiká ku for di den oranan trempan di mainta a tende un eksploshon fuerte na momentu di "start-up" siguí pa un kandela feros ku huma nan pretu pretu. Mesora a saka personal di Kuerpo di Bombero di Isla pa por kuminsá ku e trabou nan pa paga e kandela. Despues di vários intento no por a logra dominá esaki i a pidi asistensia di personal di Kuerpo di Bombero Kòrsou ku a manda su personal di Mundu Nobo pa duna asistensia. Despues di algun ratu a dominá esaki pero lagando hopi huma atras. No tabatin ningun herido pero si mester a evakuá algu empleado.

E kandela a inisiá pa ta mas eksakto na e planta "Crude Destiller" 3 (CD-3). CD-3 ta un planta ku ta krak i prosesá krudo i ku por sierto ta un planta basta peligroso i ku a kaba di ser renobá i revisá na luna di Yanüari último.