Update (2):

WILLEMSTAD.- Despues di 18 ora di e kandela na Industrieterrein Heintje Kool, Brantwer Kòrsou ta informá lo siguiente: Na e momentunan aki e kandela na e scrapyard situa na Bivak/Heintje Kool no ta forma un peliger pa habitantenan ni tampoko kasnan den e área.

Brantwer Kòrsou lo keda monitòr durante hinter dia awe e desaroyo di e kandela. Habitantenan den e área direkto lo por sinti molèster di huma durante e próksimo 24 ora ahinda.

Update:

Sektor di Enseñansa i Siensia ta konsehá pa sera skol

Willemstad – Pa motibu di prevenshon Sektor di Enseñansa i Siensia ta konsehá tur direktiva di skol ku tin skol den e bario nan di Buenavista, Heintje Kool i e area aki; esta Skol pa formashon Integral Tirso Martha, Juan Pablo Duarte VSBO i AGO, Skol Nechi Pietersz, Emmy Berthold den edifisio di Cola Debrot, pa será skol awe 23 òktober 2026.

Esaki ta pa motibu di seguridat pa tur ku ta den e área rondó di e kandela ku a tuma lugá den e area. Ta pidi tur persona pa no laga e muchanan bai skol ni kana den e bisindario komo ku esaki por tin su peligernan kuné.

Sektor di Enseñansa i Siensia ta komuniká segun e relatonan di e organisashon relashoná seguridat di Gobièrnu den transkurso di e fin a di siman aki si skol ta sigui e siman ku ta sigui.

Nos diskulpa pa e inkombeniensia.

===

WILLEMSTAD – E kandela grandi na e scrapyard na Heintje Kool ta sigui kima awe mainta, djabièrnè 23 di òktober. Riba imágennan ku EXTRA a risibí por mira ku ainda tin diferente punto kaminda kandela ta sali for di e montonnan grandi di outo bieu i material di metal.

E situashon ta preokupante, mirando ku un kantidat grandi di huma diki ta sigui subi for di e tereno. Riba e fotonan por mira klaramente ku tin diferente lugá kaminda kandela ainda ta aktivo, miéntras ku un parti grandi di e outonan bieu ta kompletamente kimá.

E imágennan ta mustra tambe ku e kandela a afektá un área ekstenso di e scrapyard. Montonnan haltu di outo destruí ta kubrí gran parti di e tereno, miéntras ku e huma ta limitá visibilidat den algun parti.

Na e sitio tin tambe un konstrukshon di metal, ku ta situá serka di e montonnan di outo a kimá. E fotonan di awe mainta ta mustra ku e situashon ainda no a terminá i ku tin material ku ta sigui kima.

Te na e momentu aki no tin informashon konfirmá tokante e magnitut total di e daño ni ki ora e kandela por ta kompleto bou di kontrol. EXTRA ta sigui e desaroyo di e situashon i lo trese mas informashon asina ku esaki ta disponibel.