Update

WILLEMSTAD.- EXTRA a tuma nota ku su ekselensia gobernador sra. Lucille George-Wout a bandoná palasio i nos no a mira sr. Ramon Chong (PNP) yega na palasio, pues kontrali na e informashon inisial ku EXTRA a haña.

E no ta duna komentario riba su bishita na gobernador. E no ta mira nada malu den e echo ku el a hasi un bishita na Eduard Braam.

Braam a baha trapi di palasio di gobernador i a splika EXTRA i otro prensa presente ku e e no por duna komentario riba kombersashon ku gobernador. Braam a bisa ku e kòmbersashon ku gobernador tabata unu ameno. Segun Braam, e echo ku el a bai gobernador no ta importante si ta e a pidi òf ta gobernador a yam’e. El a indiká tambe ku ta bon pa tur parlamentario pidi un kombersashon ku gobernador.

Pa loke ta trata e durashon di e screening, Braam a bisa ku e ta spera ku e proseso di formashon no ta bai dura muchu largu teniendo kuenta ku e pais aki ta den krísis. Braam no ta mira nada malu den su bishita na gobernador.

Kandidatonan pa minister Braam I Chong serka gobernador

WILLEMSTAD.-Un ratu pasá dr. Eduard Braam, kandidato pa minister postulá pa partido MFK a subi trapi di palasio di gobernador. EXTRA tabata presente i a presensia esaki. Naturalmente e kombersashon ku su ekselensia gobernador ta sekreto sinembargo EXTRA a komprondé ku sr. Braam a haña un yamada pa e hasi un bishita serka su ekselensia gobernador. Konsiderando ku Kòrsou ta sperando ku hopi ansiedat riba e proseso di screening di kandidatonan pa bira minister tur bista ta riba e kombersashon aki.

EXTRA a komprondé ku no ta Braam so a haña yamada pa un kombersashon den palasio. Ramon Chong e kandidato pa minister di partido Nashonal tambe lo a haña un invitashon similar.