WILLEMSTAD.- Den un entrevista ku periodista hulandes Rebecca van der Weijde el a bisa EXTRA ku su seri di ‘podcast’ DogMob ta resultado di investigashon profundo. Van der Weijde a investigá e diferente fundashonnan riba nos isla ku ta yuda kachó di kaya. ‘Ta hopi remarkabel kuantu fundashon ta aktivo, trahando ku kachónan di kaya na Kòrsou’, Van der Weijde ta bisa. Den su seri di podcast e ta investigá pa ki motibu tin asina tantu fundashon ku ta yuda kachónan di kaya. I pa ki motibu e diferente fundashonnan hopi bia no ta koperá huntu den nan lucha pa kachónan sin doño. Den su seri di podcast e ta papia tokante ‘amor pa bestia, ku ta bai hopi leu’.
Van der Weijde ta splika ku e situashon di kachónan na Kòrsou ta kompletamente otro for di situashon na Hulanda. ‘Si bo mira un kachó riba kaya na Hulanda bo por yama instansia, ku direktamente ta bin. Nan ta kontrolá e kachó i komo tal ta mira hopi tiki kachó di kaya na Hulanda. Situashon na Kòrsou ta otro. Den mi seri di podcast mi ta investigá e situashon tokante kachónan di kaya riba e isla.’
Van der Weijde ta splika ku algun aña pasá tabatin hopi atenshon pa Rosanna Kluivert ku tabatin su mes fundashon na Kòrsou. ‘Pa e fundashon Kluivert a kolektá basta sèn na Hulanda. Segun sierto media hulandes gran parti di e fondonan no a bai na e kachónan, pero a wòrdu usa pa paga hür ets.. E situashon a haña hopi atenshon na Hulanda. Den mi seri di podcast mi ta investigá kiko ta e situashon aktual. Pasobra te ainda fundashonnan ta haña basta sèn. Mi tin diferente pregunta i den e seri di podcast hende por sigui mi investigashon. Na final di e seri lo tin tur kontesta.’
Van der Weijde ta un eksperto den mundu di podcast. El a traha diferente seri di podcast pa emisora hulandes AVROTROS, mayoria di nan ta tokante tópiko kultural. El a haña tur espasio for di su doño di trabou pa investigá situashon na Kòrsou.
E seri di ‘podcast’ yama DogMob. A lansa e dos promé episodio di e seri di podcast dia 2 di yüni via ‘Podcastapp’ Podimo. Dia 9 di yüni ta saka episodio 3. Dia 16 di yüni episodio 4 lo ta disponibel, dia 23 di yüni episodio 5 i dia 30 yüni lo saka episodio 6, ku ta e último episodio.