Willemstad.- Segun informashon preliminar ku Extra ta disponé di dje shete (7) hòmber di nashonalidat Venezolano a hui for di barak di ilegal na SDKK. Konforme komunikado di polis, Sentral di Polis a keda notifiká di e huida alrededor di 1:37pm.
Manera ku tim di vigilansia a tuma nota ku tin un huida andando a tuma e medidanan nesesario i di e forma ei a stroba 3 indokumentado mas di hui. Un di e faktornan ku a hunga rol den detenshon di e 3 personanan aki ta e echo ku nan kurpa tabata mas grandi i no por a pasa fásilmente den e buraku ku a usa pa sali pafó di e lokalidat. E estranheronan indokumentá aki a koba un buraku den muraya i asina ei logra sali for di e espasio den kua nan tabata permanesé será, pendiente di nan deportashon.
A dirigí diferente unidat polisial i tambe ku sosten di helikòpter den e área di Koraalspecht, Janthiel i alrededor pa asina por buska i bolbe detené e personanan aki, pero te ainda sin resultado.
Ta investigando e kaso aki mas leu.
E grupo ku a hui aki ta programa riba buelo di repatriashon ku mester tuma lugá dia 11 di sèptèmber aki.