WILLEMSTAD.- Un kriadó di bestia na Rancho ayera a lanta tristu ora a tuma nota ku kachónan feros a subi su tereno i masakrá kantidat di su karnénan. Ta trata di karnénan Dorper (karnénan blanku ku kabes pretu i ku ta bini originalmente di Afrika), un tipo di karné masha karu. Pa kolmo ta trata di karnénan ku tabata dèk.

Segun EXTRA a komprondé, den oranan di anochi pa mainta tempran e kachónan grandi i feros aki a bula over di muraya hopi haltu pa nan drenta den e kura kaminda e karnénan tabata. Nan a habraká 6 karné mama dèk i a herida 13 mas. Mester  a buska dòkter di bestia mesora pa por a pasa e karnénan ku a keda na bida angua pa asina mira ku por skapa nan. A hinka nan den un kas den konstrukshon pa einan trata nan i asina tene nan mas mihó será ainda.

E asuntu di kachó ku ta kana los ta un problema grandi na Kòrsou. Kachónan razu, kachónan grandi ku ta kousa molèster pa kriadónan di bestia. Tambe nan ta un molèster pa hende ku ta kana den nan bario ya ku nan ta ataka. E situashon aki ta rekerí atenshon urgente.

Ta konstantemente kriadónan di bestia ta bira víktima di e kachónan ku ta kana rònt. Un maneho di kachó ku ta kana riba kaya ta esensial i nesesario.

Riba e kombinashon di fotonan un bista kon e karnénan a keda despues di a keda ataká pa kachónan den Rancho.