Awe te 4’or ta 5908 hende a sostené lista

WILLEMSTAD.- Den e di dos briefing di Konseho Supremo Elektoral di awe Pacheco Römer a duna di konosé ku te ainda tur kos ta kanando hopi bon na urnanan. Si ayera te ku 4’or di atardi un kantidat di 6744 hende a duna sosten na un lista, awe djadumingu un kantidat di 5908 hende a hasi esei. Pues pa awe djadumingu te ku 4’or di atardi alrededor di 700 hende Ménos a sostené listanan. Sinembargo e total di hendenan ku a sostené listanan entre ayera i awe si a yega kaba na 15765.

Konseho Supremo Elektoral ta kere ku ainda un kantidat di entre 2000 pa 2500 hende lo por bai firma listanan pa yega na un tota di 18000 hende ku a sostené listanan den e dos dianan aki.

Römer a enfatisá ku te awor aki e kantidat di sostenedónan ta mas tantu ku tur otro bia ku tabatin sostenementu di lista. ‘Aparentemente pueblo ke mira partidonan nobo den e kontienda polítiko”.

Awe nochi despues ku urnanan sera 8’or lo kuminsá e konteo di votonan. EXTRA lo trese tur e detayenan.