WILLEMSTAD.- Situashon di tráfiko na Sta. Rosa ta un káos kompletu. Prinsipalmente den oranan di mainta tempran ora ta hiba mucha skol, outomobilistanan ta faya ku reglanan di tráfiko manera ta e kos di mas normal ku tin.

No solamente t’asina ku e rotònde ku a konstruí remplasando lusnan di tráfiko a hasi e filanan mas largu ainda, pero e violashonnan di leinan di tráfiko ta hopi i preokupante. Parlamentario pa MFK, Juniel Carolina tambe ta preokupá pa e situashon aki i ta lamentá ku polis no ta kontrolá mas frekuente den e aria. “A kuminsá hasi kontròl polisial frekuente un tempu, pero a stòp atrobe i kosnan a sali kompletamente for di man segun mi ta komprondé”, Carolina ta bisa.

E problemanan ta kuminsá na haltura di e krusada Kaminda Rignald S. Recordino i Kadushistraat. Outonan riba Kadushistraat ta usa un hanchi di kabritu tras di Ritz Sta. Rosa pa kòrta i subi Kaminda Rignlad S. Recordino okashonando ku tráfiko ta kongestioná mas.

Outonan ku sigui kore i para na e krusada Kadushistraat i Kaminda Rignald S. Recordino ta sali dos, dos banda di otro pa lora subi Sta. Rosaweg pa bai direkshon di e rotònde opstakulisando tráfiko di ámbos banda. Apénas 5 meter despues di e krusada aki outonan ta sali den “verboden” for di Kaya Pita pa lora man robes subi Kaminda Rignald S. Recordino bai direkshon di rotònde.

For di Kaya Tuna tambe outomobilistanan ta kore den “verboden” subi Seru Loraweg pa asina yega mas lihé na e rotònde i sigui nan ruta. Esaki ku tur e riesgonan pa seguridat den tráfiko ku e ta trese kuné tur mainta.