Despues ku pasaheronan a nota ku a kambia ruta

WILLEMSTAD.- A surgi un káos riba e barku krusero Carnival ora ku  pasaheronan a komprondé ku e barku ta desviando henter e ruta planiá. E barku tabata planiá pa pasa Kòrsou tambe, pero pa motibunan di problema ku otro, mester a kambia di ruta.

Pasaheronan ta rabiá pa motibu ku nan a komprondé ku e krusero tabata sa di e problema promé ku nan a subi e barku. Pero simplemente no a bisa nan esei te ora ku nan tabata riba e barku.

E loke ku a hasi e pasaheronan furioso ta ku e barku a kambia di ruta pa un ruta kompletamente nobo i mas barata.

Ta riba e krusero nan a komponé ku e krusero ku mester a pasa Aruba, Kòrsou i Turks i Caicos, awor lo a pasa e portanan di Nassau, Princess Cays, Freeport i Half Moon Cay.

Carnival a bisa pasaheronan ku e kambio di rumbo tabata pa motibu di problema den e motor ku a pone ku e krusero no por a move na velosidat haltu ora ku el a sali for di Porta Canaveral na Florida.

Téknikonan a trata e  problema ku a limitá e velosidat di krusero i a pidi  diskulpa pa e interupshon inesperá di nan plannan di fakansi i ta lamentá di no por entregá e itinerario ku a plania.

E krusero a ofresé e pasaheronan ku tabata deseá di kanselá nan biahe nan plaka kompleto òf un kupòn di 400 dòler ku por a keda usá riba e barku si nan a opta pa kontinuá e biahe riba e barku apesar di e itinerario nobo.

Apesar di e ofertanan, pasaheronan no a keda kontentu ora nan a tende e notisia i esaki a bira un káos.