WILLEMSTAD.- Karin Bosman resientemente a publiká un buki ku ta yama ‘Stop het Zwijgen’. Segun Bosman ta hopi importante ku mas hende posibel lo ta na altura di kontenido di e buki.

Den un entrevista ku Extra Journaal awe el a duna di konosé ku pa e motibu e promé 25 persona ku ta manda un mail na ‘redactie@extra.cw’ por haña un ehemplar di e buki grátis.

Bosman ta inisiadó di Founder Report App BV, i tambe About Workplace Harassment BV. E ta outor di e buki ‘Spugen op de tosti van Hans’ i awor, huntu ku Frank Peters, el a skirbi ‘Stop het Zwijgen, adviezen voor het voorkomen en aanpakken van grensoverschrijdend gedrag in organisaties’.

Bosman ta eksperto den e tópiko di intimidashon seksual na boka di trabou. Algun aña pasa el a hasi un investigashon grandi na Kòrsou tokante esaki. E investigashon a mustra ku den aña 2017 un total di 33 porshento di trahadónan na Kòrsou a duna di konosé ku nan tin molèster di intimidashon seksual na boka di trabou.

Su buki nobo, ku ta yama, ‘Stop het zwijgen’ no ta trata solamente intimidashon seksual na boka di trabou, pero ta relashoná ku tur komportashon ku no ta apropiá na boka di trabou. Den e buki tin hopi aviso i tepnan kon doñonan di trabou i tambe koleganan por atendé ku komportashon asina.

E buki ta interesante pa tur hende ku ta traha den un organisashon; grandi ku chikí.

PORTRET

Outornan di ‘Stop het Zwijgen’ Karin Bosman i Frank Peters