WILLEMSTAD.- Ayera tur hende a keda babuká despues di a tende presentashon di investigashon di produktonan di karni den 20 supermerkado na Kòrsou. For di e investigashon ku Servisio Veterinario a kondusí a sali na kla ku karninan den 18 supermerkado tin un grado haltu di kontaminashon di bakteria ku ta hasi hende malu. E bakterianan aki no mester ta den e produkto ku ta ser bendé na konsumidó.

Inge Drost, stazjèr a kore 56 luna stazje na Servisio Veterinario. Pa su stazje e mester a hasi investigashon di nos karninan den supermerkado. Título di e investigashon ta: “Kòrsou: Ki tipo di karni bo tin?”. E investigashon a start den òktober 2018.

A hasi investigashon di kalidat di karni na Kòrsou serka 20 supermerkado. A analisá karni di porko, galiña, karni di baka, karné, kabritu, i tambe karni mulá.

E meta di e investigashon ta pa wak si supermerkadonan ta kumpli ku e liña di maneho di etikèt i ku esaki ta kuadra ku e karni ku tin den e empake, komo tambe e midimentu (nulmeting) di estado mikrobiologia di e karni.

A hasi vários análisis, i un di nan ta e produkto Sulfiet ku ta pone den karninan pa hasi esaki mustra mas kòrá. E produkto Sulfiet aki tin konsekuensia pa kueru di hende.

A chèk bakteria ku ta kousa ku hende ta bira malu, e kontaminashon den karni di e bakterianan aki di supermerkadonan. Tin tres sorto di bakteria ku ta hasi hende malu kual ta Listeria, Salmonela i Ecoli. E dos últimonan ta duna hende sakamentu i tambe diarea. Niun di e tres bakterianan aki no mester ta den e karni.

A investigá e proseso di higiena. Kon limpi e sitio unda ta abastesé e karni ta.

A investigá e etikèt ku tabatin riba e produktonan den e supermerkado. Tur etikèt tabatin preis, peso, peso pa kilo, kondishon den kual ta warda e produkto. Pero no ta pone e pais for di unda e karni ta bini ni tampoko fecha di produkshon di e karni. Tambe ta falta un punto esensial riba e etikèt ku ta bisa ku e produkto ta “fresku’, òf ta un produkto kongelá p’asina e konsumidó sa kon pa atendé ku e  produkto.

A hasi investigashon riba karné, galiña, karni di baka, karni di kabai i di porko. Den karni mula mester tin karni di baka. Pero loke ku a enkontrá ta un kantidat di karni bruá den otro entre otro karni di karné, galiña, kabai i di porko. Remarkabel e karni ku mas a sobresalí den e karni mulaá ta karni di kabai.

A investigá 7 empake di kabritu pa mira si en bèrdat ta kabritu tin den e empakenan. A  resultá ku den e empakenan tabatin karné.

Di e kantidat di 20 empake ku a kontrolá, den 16 empake e kontenido no ta kuadra ku loke tin skirbí riba e etikèt.

A kontrolá e kantidat di Sulfiet den produktonan ku tabata negativo serka 22 supermerkado. Solamente dos supermerkado tabata usa e produkto aki.

E resultado di bakteria den karninan a resultá ku serka 18 supermerkado e karni ta kontaminá ku un bakteria ku ta hasi hende malu i solamente dos supermerkado ta liber di kontaminashon di e karni. E bakterianan ku ta hasi hende malu ku a topa na promé lugá ta Listeria, Salmonela, i Ecoli. Sigur 10% di e totalidat di e 20 supermerkado nan produktonan tin kontaminashon. E tres bakterianan sigur no mester ta presente den karni ku ta keda ofresé òf bendé na e konsumidó.

A kontrolá e produkto serka kua ta haña mas tantu kontaminashon i esaki tabata galiña ku ta keda importá, igualmente e karni mulá tabatin un porsentahe di kontaminashon haltu, galiña, karni di baka, i karni di baka importá tabatin kontaminashon. Esaki ta e investigashon ku a realisá.

https://extra.cw/bastante-hende-malu-ta-infekta-ku-bakteria-di-salmonela-listeria-of-ecoli/