WILLEMSTAD.-Un karta di minister di finansa a bai pa inspektor di belasting sra. Jamila Isenia den kua e titular di finansa ta pidi e hefe di servisio pa presentá un plan adaptá, pa mas tarda 21 di novèmber, den kua ta indiká kon ta bai atendé ku e atraso den prosesamentu di aanslagnan pendiente.

Minister di finansa den su karta ta bisa ku e ta realisá ku e aangiftenan riba 2022 tin un atraso grandi i ku nan ta sigui oumentá segun mas aangifte ta drentando. E kantidat di aangifte ku servisio di impuesto a risibi ta alrededor di 23.000 di kua a atendé kaba alrededor di 14.000 i ta sobra alrededor di 9.000 aanslag ku meresé atenshon.

Pa mas tardi djamars otro siman e mandatario ke haña kontesta di inspektor di belasting. E mandatario ke mira un planifikashon kon ta bai sigui atendé e prosesamentu di aanslagnan pa e sobrá di e aña aki.

E siguiente ronda di ponementu di aanslag mester a tuma lugá mas tarda awe djabièrnè 17 di novèmber i den mesun rosea e minister ta mustra ku restitushon tambe mester tuma lugá promé ku 22 di desèmber próksimo.

Ademas e minister ke haña tur djabièrnè un lista detayá pa loke ta trata planiamentu di e trabounan ku mester tuma lugá pa garantisa ku ta kumpli ku e deadline stipulá.