Tur mayor ku ker partisipá por pasa na Kas di Beibel pa registrá

WILLEMSTAD. - Resientemente Kas di Beibel a publiká un buki nobo titulá “Ban lesa Beibel huntu den 100 stap”. E buki aki ta speshal pa mayornan por lesa Beibel huntu ku nan yunan i alabes hasi aktividatnan ku tin den e buki lokual ta yuda ku e muchanan ta keda kòrda e historia mihó.

Kada un di e stapnan ta konsistí di e siguiente elementonan:

• 
  

• un teksto di Beibel pa lesa huntu

• 
  

• un ilustrashon pa studia i papia di dje

• 
  

• un aktividat pa hasi algu òf pensa ariba

• 
  

• pregunta pa reflekshoná i diskutí

• 
  

• kosnan interesante den kuadro di historianan bíbliko.

• 
  

Komo ku e buki aki, ta diseñá pa ser usá den famia òf den gruponan di mucha, Kas di Beibel a yega na un plan pa lansa un kampaña di lesa Beibel durante 2023.

Tur mayor ku ker partisipá por sea pasa na Kas di Beibel pa registrá pa asina huntu ku su yunan hasi un esfuerso pa lesa e 100 historianan durante di aña 2023.

Lo tin oportunidat pa partisipantenan kompartí eksperensia i pòtrèt via di Facebook i Instagram.

E kampaña ta habrí tambe pa tur grupo di mucha ku ker partisipá. Den kaso di un grupo, e lider ta registrá e grupo pa asina nan por partisipá.

E tim di Kas di Beibel ta trahando duru riba tur detaye pa asina por lansa e kampaña asina kuaresma kuminsá.

For di awor, tur mayor ku ta deseá por pasa na Kas di Beibel pa asina registrá pa e kampaña. Mayornan ku registrá lo haña deskuento spesial riba e buki.

E tim enkargá ku e kampaña ta spera ku hopi mayor lo partisipá huntu ku nan yunan i asina konosé tur e historianan interesante di Beibel. Pa mas informashon por yama mi na 560-0020.