WILLEMSTAD.- Funshonarionan di MEO i tambe SOAW ayera a topa ku un kas di grandi kual no tin su pèrmitnan na òrdu. Ta trata aki di e kas di grandi situá na Kaya Klemok ku den e último dianan aki ta den notisia.

Tur kos a inisiá na luna di yüni kaminda tabatin un grandi ku a kai pero un trahadó a neglishá i kana pasa banda di e grandi manera nada a pasa. Video di kámara kaminda por a mira e akto aki a kuminsá kore riba medionan sosial. Esaki a trese hopi rabia i konsternashon den komunidat pa e forma kon a trata un grandi.

Segun informashonnan ku EXTRA ta dispone di dje e trahadó en kuestion a keda retirá. Pero e video aki a logra Sali despues ku a retirá un otro trahadó pa un otro motibu. Komo un akto di rabia e trahadó a hasi e video aki públiko. Pero esaki no ta hustifiká trato di e eks trahadó. Mirando kuantu rabia esaki a trese, e funshonarionan a bai personalmente ayera pa wak situashon di e kas di grandi aki.

A konstatá ku e kas di grandi aki ta basta na òrdu i limpi. Pero e pèrmitnan no ta na òrdu. Tambe e doño mester laga atendé infrastruktura kual tampoko ta korekto. A kue un kas hasié un hogar di kuido pa hende grandi pero esaki no ta kompletamente apropiá.

E doño a risibí un amonestashon i e funshonarionan lo bai bek pa wak si a atendé tur loke a keda indiká na nan.