Kas di Kòrsou ta enfatisá ku ta di sumo importansia pa tur hende ku tin plan pa muda pa Hulanda ta bon informá i tin nan asuntunan bon reglá promé nan subi avion. Lamentabelmente ta drenta por lo ménos 5 kaso pa siman na Kas di Kòrsou di yunan di tera ku ta subi Hulanda sin kaminda di keda i sin por inskribí. Esaki ta nifiká ku nan no por haña trabou ku e konsekuensia ku nan no por generá entrada pa por sobreviví. Di e forma aki nan ta bin kai den un situashon sumamente difísil kual Kas di Kòrsou no por solushoná fásilmente.

Pa evitá e tipo di situashonnan aki mester konsientisá i eduká esunnan ku ke muda pa Hulanda tokante e proseso i eksigensianan pa por establesé akinan. Gabinete di minister Plenipotensiario di Kòrsou na Hulanda (Kas di Kòrsou) a tuma nota di ekspreshonnan hasi den prensa tokante e situashon lamentabel di sierto personanan ku a keda desampará na Nijmegen despues ku nan a muda pa Hulanda pa bin laborá den sektor di kuido, bou di guia di e organisashon Teamzorg.

For di e promé instante Kas di Kòrsou a haña informáshon di un polítiko di Kòrsou tokante e situashon i a mobilisá mesora pa wak kon por duna e grupo aki yudansa. Pa su siguiente dia, 7 di sèptèmber ku a pasa, direktora di Kas di Kòrsou a tuma kontakto ku e grupo i a papia ku nan. Despues di a haña un mihó bista di e situashon, minister plenipotensiario, huntu ku su direktora i e trahadó sosial di Kas di Kòrsou, a deliberá pa wak di ki forma por ofresé asistensia.

Pa 8 di sèptèmber trahadó sosial di Kas di Kòrsou a tuma kontakto telefónikamente ku e grupo pa haña un ʹupdateʹ di nan situashon. Lokual ku a konstatá ta ku e personanan aki a mester a sali for di e kas kaminda nan tabata keda, algun di nan a pèrdè nan trabou, nan no a risibí pago, no tin di kome i algun di nan no ta inskribí na Hulanda. Na e momentu ei a disidí pa bai personalmente Nijmegen pa wak e situashon. Na yegada a sinta ku e grupo i a splika ku Kas di Kòrsou por yuda dor di intermediá. E trahadó sosial a papia ku polis pa e situashon di kas, tambe ku gemeente pa por inskribí esunnan ku ainda no ta inskribí i tambe a intermediá serka abogado pa e parti di trabou i pago. Banda di esaki a konstatá ku un miembro di e grupo tabata malu di salú i tambe aki e trahadó sosial a sòru di kana kaminda di dòkter kuné.

For di 7 di sèptèmber te ku awe Kas di Kòrsou ta den kontakto ku e grupo aki. Aktualmente e proseso ta andando pa inskribí e personanan aki na gemeente i tambe pa regla bibienda i wak posibilidat pa trabou aki na Hulanda. Pues Kas di Kòrsou ta sigui hasi su máksimo esfuerso pa guia i sostené e grupo aki den e situashon lamentabel ku nan ta aden.