WILLEMSTAD.- Ayera den oranan di anochi polisnan a keda dirigí pa Nabij Vetter despues di a risibí informashon di un kaso di tiramentu ku a kaba di tuma lugá.

Na nan yegada na e sitio mesora a sera e área pa asina por kuminsá ku investigashonnan mirando ku tabatin un kantidat di huls na e sitio. Durante investigashon preliminar a konstatá tambe perforashon di bala den un muraya di kas, dos vehíkulo i tambe un kachó ku a resultá herida. Testigunan a indiká ku nan a mira un vehíkulo aserka e kas i mesora a los un kantidat di bala dirigí riba e kas aki.

Despues e sospechosonan a bandoná e sitio den un vehíkulo kolo blou skur.

No tabatin ningun hende ku a resultá herida pero investigashon ta kontinua pa asina saka afó ken ta responsabel pa e kaso aki.