Ku invershon na entre otro Kòrsou

WILLEMSTAD. - Resientemente Korte di Utrecht a apsolvé un akusado femenino di labamentu di plaka. Ministerio Públiko ta di opinion ku e akusado kasá (muhé) di akusado mayó (hòmber) mester tabata sa ku e hòmber ta den baho mundu i ku e loke ku e hòmber tabata kumpra i pone riba nòmber di su kasá, ku e kasá mester tabata sa ku e plaka ku e hòmber ta kumpra e propiedatnan ta prosedente di aktividatnan ilegal. Pero Korte ta di opinion, ku no nesesariamente e kasá mester sa kiko e aktividat di e hòmber tabata.

Ta trata di un pareha marokano ku a kasa ku otro dia e novia tabatin 16 aña di edat i e hòmber tabatin 27 aña di edat.

Na opinion di Ministerio Públiko t’asina ku e hòmber for di aña 1996 tabata atendé ku aktividatnan froudulento i labamentu di plaka. E plakanan aki e tabata keda invertí den mueblenan inmóbil. Ya ku su 19 aña di edat, e kasá tabatin edifisionan riba su nòmber na Alemania. E plakanan di hür tabata bai riba kuenta di e kasá i despues di akinan e plakanan ta disparsé.

Na aña 2003 e hòmber a kai será pa 3 luna sospechá di ta kometé froude ku invershonnan riba bolsa.

Na aña 2006, e pareha a sera un hipotek aki na Kòrsou serka un kompania riba nòmber di e kasá. Minister Públiko ta fuertemente bou di e impreshon ku e kasá mester tabata sa ku e plakanan ku e hòmber ta dil kuné, ta plakanan ilegal.

Kontrali na e pensamentu di Ministerio Públiko, Korte ta di opinion ku no nesesariamente e kasá lo mester sa fuente di e plakanan ku e hòmber tin. Dia ku e pareha a kasa, e kasá tabatin 16 aña di edat i na su di 18 aña di edat, nan a bai biba na Alemania.

Dia el a bai biba na Alemania, e kasá no tabata sa niun pia di palabra aleman, miéntras ya e dia ei e edifisionan tabata riba su nòmber kaba.

E loke ku semper a kere, ta ku e kasá tabata atendé ku invershonnan riba bolsa. E echo ku e hòmber a keda 3 luna será sospecha di froude ku invershonnan, no ta motibu pa pensa ku e kasá lo mester tabata sa kiko ta e motibu ku e hòmber a bai será.

En todo kaso, Korte ta di opinion ku no por proba ku e kasá ta na altura di e aktividatnan di e hòmber i asina a apsolvé e kasá di tur akusashon.