PHILIPSBURG.- Gobièrnu di St. Maarten e wikènt aki a duna di konosé ku un grupo di 159 persona a yega St. Maarten for di Saint Vincent & the Grenadines. E grupo a yega riba un barku di Celebrity Reflection Cruise. E barku a evakuá e grupo for di e isla pa motibu di erupshon di volkan La Soufriére. E grupo ta konsistí pa gran parti di hende ku nashonalidat merikano, di Canada i Reino Uní. Na momentu ku e grupo a drenta haf di St. Maarten tur por a mustra ku nan a tèst negativo riba COVID-19 den un tèst di PCR. Na momentu ku e barku a yega haf di St. Maarten un delegashon tabata presente, ku a konsistí di minister-presidente Silveria Jacobs, minister di Hustisia Anna Richardson, sekretario general di e ministerio di Turismo, Asuntunan Ekonómiko, Transporte i Telekomunikashon Miguel de Weever i tambe Patrice Gumbs na nòmber di e Departamento di Relashonnan Eksterno.
Tambe tabatin representantenan di Canada i Reino Uní presente pa yuda e grupo. Algun di nan a pidi pa yudansa pa keda den un hotèl na St. Maarten òf pa kumpra ticket di aviashon.
Minister-presidente Silveria Jacobs a bisa ku e ta kontentu ku St. Maarten por a yuda e grupo ku mester a sali Saint Vincent & the Grenadines riba término hopi kòrtiku pa motibu di erupshon di e volkan.
Segun Jacoba pueblo di St. Maarten ta solidario. ‘Nos lo sigui yuda i duna asistensia na nos ruman hòmber i muhé di Saint Vincent & the Grenadines.’