8733 hende a pasa ámbos bakuna kaba

WILLEMSTAD.- E sifra te awe mainta 10’or ta mustra ku ku 43762 persona a traha un sita pa bakuna, miéntras ku 23497 a bakuna kaba di kua 8733 a pasa ámbos bakuna. Na palabra dr. Jerry Semper dunando informashon riba e proseso di bakunashon. E médiko a indiká ku Kòrsou ta bayendo den bon direkshon, ta bayendo pa e ‘herd immunity’.

Mas aleu Semper a korda tur hende ku ta den karentena pa kambia nan fecha pa bakuna. For di momentu ku un hende ta den karentena ta debí ku sea e tabata den kontakto ku un hende infektá ku Covid òf e ta hopi serka di hende infektá. Un hende den karentena mester duna prioridat na e echo ku e ta den karentena i komo tal e no mester sali kas, tampoko pa bai bakuna. E bai bakuna e por pega otronan na e sitio di bakunashon i ademas debí na e Covid ta pone ku médikonan na e sitio no por distinguí si ta efektonan di e Covid òf ta efektonan di e bakuna.

Otro petishon ta pa hendenan bisti paña manga kòrtiku kual ta mas fásil pa hisa e manga i tuma e bakuna fásil. hendenan ku ta tuma remedi pa alergia te keda pidí pa no tuma e remedi di alergia riba dia ku mester bai bakuna. Meskos ta konta pa hendenan ku ta tuma remedi pa hasi sanger delegá. Ta bon pa informa esei ya asina por duna splikashon kua ta e pasonan mester sigui.

Dr. Semper a enfatisá ku e informashon disponibel awor aki ta mustra ku e bakuna por duna un protekshon basta largu, tur kos ta dependé si e vírus no mutuá. Di tur manera Kòrsou ta riba bon kaminda.