Durante e último tres simannan

WILLEMSTAD.- Durante e último tres simannan, den estrecho kolaborashon ku Wardakosta Merikano i Wardakosta di Region Karibe, e barku di Marina Hulandes Zr.Ms. Holland a ehekutá diferente operashonnan kontra droga.

Den esaki Zr.Ms. Holland pa promé biaha a tuma riba dje e kordinashon i  atministrashon di e unidatnan partisipante, komo Komandante di e ‘Surface Action Group’.  El a keda sostené pa avionnan marítimo di patruya tantu di Wardakosta Merikano komo Wardakosta Region Karibe. E kolaborashon aki ya a kondusí hopi rápido na resultado.

E último tres simannan, e barku di Marina Hulandes Zr.Ms. Holland, den estrecho kolaborashon ku dos Cutter (Fast Response) di Wardakosta Merikano i e Cutter Panter di Wardakosta Region Karibe, a ehekutá operashonnan anti droga aktuando komo un Grupo di Akshon (Surface Action Group). Pa promé biaha, a tuma riba dje e kordinashon i  atministrashon di e unidatnan partisipante, komo Komandante  di  e ‘Surface Action Group’  i komo tal a keda sostené pa avionnan marítimo di patruyahe tantu di Wardakosta Merikano komo Wardakosta Region Karibe. E kolaborashon aki ya a kondusí hopi rápido na resultado.

25 di novèmber último, ku un asina yamá ‘go-fast’ a keda interseptá. E boto rápido a keda detektá pa ‘sensor’ nan a bordo di Zr.Ms. Holland den serkania di un ruta konosí di kontrabanda. E barku patruyero despues di esaki a kuminsá ku un persiguishon i a lansa su botonan di intersepshon, asina yamá  FRISC (Fast Raiding, Interception and Special forces Craft).  Asina ku e pasaheronan di e ‘go-fast’ a ripará ku nan tabata wòrdu persiguí, nan a kuminsá tira e paketenan di kontrabanda den  laman. Finalmente a obligá e ‘go-fast’ pa stòp dor di disparonan di atvertensia.

Una bes na kantu a bordo ainda a deskubrí mas o ménos 200 kg di kontrabanda i e kuater pasaheronan prosedente di Repúblika Dominikana i Colombia a keda arestá pa Wardakosta Merikano.  Finalmente a saka mas o ménos 1000 kilo di kontrabanda for di laman, pa medio di kua huntu ku e aresto aki 1200 kilo di kokaina a ser kitá for di riba merkado.

Algun dia despues un biaha mas tabata ‘bingo’. Durante un patruya di un Dash-8 riba 28 di novèmber , e avion marítimo di patruyahe di Wardakosta Region Karibe, a nota un embarkashon sospechoso.  A indiká  e posishon na Zr.Ms. Holland, despues di kua su FRISC i e helikòpter di abordo, NH-90,  a ser desplegá i a dirigí un di e ‘cutter’ nan Merikano direkshon di e kontakto.  Pa e ratu ku e barku Merikano a yega, e helikòpter di bordo NH90 i e FRISC a obligá e ‘go-fast’ pa stòp pa medio di tirunan di atvertensia.  E Merikanonan ta detené tres pasahero i ta konfiská 1855 kilo di kokaina.

3 di desèmber un avion patruyero Merikano a detektá un ‘go-fast’ ku tabata nabegá hopi rápido. Riba esaki un di e ‘cutter’ nan Merikano ta risibí órden pa interseptá esaki.  Durante intersepshon kuater sospecho ta keda arestá i 100 kilo di kokaina ta keda konfiská.

Algun dia despues, un biaha mas un avion patruyero ta nota un ‘go-fast’. E boto sospechoso tabata riba un distansia basta leu di Zr.Ms. Holland,  pa kua motibu un persiguishon largu a kuminsá,  pa interseptá e ‘go-fast’. Despues ku a aserká e ‘go-fast’ basta djaserka, pero for di  bista, e helikòpter i ámbos FRISC a keda lansá pa konsekuentemente sorprendé e pasaheronan di e ‘go-fast’ kompletamente.  E ekipo di Wardakosta abordo di e FRISC a haña, ademas di tres pasahero, kasi 570 kilo di kokaina. E tres pasaheronan i e kontrabanda a keda entregá na Wardakosta Merikano.

Djaluna 13 di desèmber Zr.Ms. Holland a deskubrí un ‘go-fast’. Dentro di tempu kòrtiku e helikòpternan di bordo i ámbos FRISC a keda lansá pa interseptá e ‘go-fast’. E biaha aki si e boto a ninga di stòp i despues ku a lòs tirunan di atvertensia e motornan di e boto a keda desaktivá for di e helikòpter. Tres pasahero  a keda detené i a konfiská 110 kilo di kontrabanda, ku a ser entregá na Wardakosta Merikano.

Komo konsekuensia di e kolaborashon eksitoso entre unidatnan di Defensa nabegando i bulando, Wardakosta Merikano i Wardakosta Region Karibe, kasi 5000 kilo di kokaina a ser konfiská i diesshete sospechoso entregá na Wardakosta Merikano pa ser persiguí. Ku esaki e forma hopi estrecho di kolaborashon aki tabata altamente eksitoso i un biaha mas ta suprayá e bon laso ku ta eksistí enter Wardakosta Merikano, i e sosionan Hulandes den Region Karibe.