WILLEMSTAD.- Konseho di Minister a disidí ayera ku kasinonan por habri nan porta atrobe. Esaki naturalmente bou di reglanan estrikto.

Kasinonan ta práktikamente e úniko negoshinan ku bou di e medidanan vigente ta obligá pa tene nan portanan será. Djaluna último promé minister Eugene Rhuggenaath a anunsiá ku e medidanan di entre otro "toque de queda" i lei seku parsial ta keda vigente te 11 di yanüari 2021.

Pero awor a hasi tòg un kambio dunando posibilidat pa kasinonan tambe habri den e oranan ku esaki ta posibel. E kasinonan tambe mester tene nan mes na e orario di sera di 8'or meskos ku tur otro negoshi.

Mas aleu kasinonan mester sòru pa tin sufisiente distansha sosial, bistimentu di tapa boka obligatorio i no por sirbi ni bende bebida alkohóliko segun EXTRA por a komprondé.