WILLEMSTAD.- No kumplimentu di Fundashon Kas Popular (FKP) ku palabrashon pa entrega di kas ta kousa di gastu èkstra pa e kumpradónan di kas na e proyekto di Wechi. Esaki pasobra nan no por a drenta e kas ku nan a kumpra riba e fecha planiá.
Asta tin kumpradó ku ta biba den eksterior ku a hasi gastu di paga un biahe pa bini Kòrsou pa ora nan a yega nan a ripará ku e kas no ta kla ainda. Tin ehèmpel ku FKP a bisa ku e kas ta kla, pero ora a yega Kòrsou a ripará ku no a basha betòn di e dak di kas ainda.
Asina un grupo di kumpradó a indiká den deklarashon na EXTRA. Pero, apesar di tur e inkunbiniensianan i falta di kumplimentu, nan ta bisa ku FKP no ke tende tokante tuma responsabilidat pa nan fayonan i no ta dispuesto tampoko pa kompensá gastunan.
Ora ku e aña aki porfin a entregá algun di e kasnan e doñonan a tuma nota di un kantidat di kosnan robes den e konstrukshon òf kosnan ku simplemente no a instalá den e kas. Ora reklamá e problemanan aki FKP ta bisa ku a hasi pedido di material i ku esakinan ta na kaminda, pa lunanan despues resultá ku no a hasi pedido ainda.
Esakinan ta banda di e echo ku e kasnan ta traha ku malchinan robes i e kasnan ta 7 centimeter kòrtiku. Ta trata problemanan ku kurá di kas, baño i kushina djis pa menshoná algun konforme loke e doñonan di kas ta indiká.
Tin kumpradó tin problema ku bañonan kaminda tin mosaiko manchá, pòchi di wc i laba mano kibrá, mobilario di baño mal instalá. Otronan tin problema ku material mas barata ku a pone pa protehá esaki, ku FKP ta nenga di rekompensá i ke paga solamente e diferensia den preis di material.
Tin problema tambe ku konstrukshonnan straño ku baño kaminda a hisa e plafòn di e baño i pone bentana te haltu ku mester usa trapi pa por yega na dje. E baño ku por mira den e kas modelo ku FKP a mustra e kumpradónan, ta trahá ku kompletamente otro koló di mosaiko kompará ku e kasnan ku a entregá.
Otronan atrobe tin problema ku protekshon pa murayanan di kushina ku no a instalá, pero si a paga pe den e preis di e kas. Tambe tin kas ku a lubidá di instalá baki di laba tayó den kushina.
Mas di e problemanan ku tin ta ku porta di kurá di kas ku ta mas smal ku lokual a kumbiní ora di benta. Konsekuentemente ta outonan chikí su por drenta kurá di kas.
Un doño di kas ku tin un modèl di outo mas grandi mester laga su outo para pafó. Tambe e portanan di kurá ta mas haltu, pues mas smal pero mas haltu.
Esaki a trese problema ku instalashon di e portanan. Pa solushoná e problema aki a disidí di pone algun blòki adishonal riba e muraya di kurá pa asina e por instalá e porta.
Esaki un biaha mas no ta konforme e akuerdo di e konstrukshon ku e doñonan di kas a firma pe. Den bista di e doñonan a kònkel algu pa solushoná un problema loke a keda masha mahos.
Meskos a propagá ku sierto di e kasnan lo tin den e patio patras di kas un kuarto será pa warda por ehèmpel hèmber, mòp i basora, pero ora a entregá e kasnan no a traha e kuarto aki. Mester hiba diskushon fuerte pa a laga traha esaki tòg.
E doñonan di kas no ta haña esaki ta e manera korekto pa FKP atendé ku tur e defisiensianan. Kontinuamente ta regla pa tin hende na e kas pa e trahadónan pasa, pero nan no ta blo. Esaki ta un molèster enorme, spesífikamente pa esnan den eksterior ku a kumpra kas, pero ta manera ku FKP no tin kunes ku esaki, kumpradónan ta terminá bisando.
