WILLEMSTAD.- Refineria di Kòrsou (RdK) komo doño di e instalashonnan di refineria a entamá un huisio sumario kontra Refineria Isla (PDVSA) ku ta hür e refineria na Kòrsou. E kaso mester a tuma lugá awe mainta, pero el a keda kanselá despues ku e partidonan a haña otro na mesa.

Manera ta konosí e dianan aki tin representantenan di un kompania di renombre na Kòrsou den kuadro di buskamentu di partnernan pa tuma over e operashon di refineria Isla despues di fin di desèmber. E kontrakt ku PDVSA pa hür di e instalashonnan ta vense na desèmber 2019.  E esfuersonan ta grandi pa buska un partner fuerte pa tuma over i asina garantisá kuponan di trabou dirèkt i indirekto. Ademas den e senario ku refineria mester sera e impakto riba hinter nos komunidat lo ta hopi grandi i fuerte.

Tantu di parti di RdK komo Refineria Isla a konfirmá pa EXTRA ku partidonan a yega na akuerdo pa duna e kompania ku ta bishitando Kòrsou e dianan aki e informashon ku nan mester pa asina kaba di hasi nan evaluashon si nan ta ‘bai laman’ ku Kòrsou si òf no. Importante den esaki ta ku Isla (PDVSA) ke koperá pero no ke publisidat di loke ta pasando. Mas detaye den edishon di EXTRA.