Despues di a skucha 4 testigu

WILLEMSTAD.- E hòmber D. Merced awe lo mester presentá den sala di korte akusá pa dòbel asesinato dia 8 di aprel 2018 riba kaminda di Westpunt.

Anteriormente e kaso a keda presentá pro forma. Segun e akusashon e akusado a tira riba outo di Michael Mercera ku tabata shofùr i tabata huntu ku Jurensley Martina. E akusado lo a tira dirigí riba e shofùr i a pone ku el a kore bai dal den un palu di indju ku e konsekuensia fatal.

Relashoná ku e aksidente Martina a haña hopi sla i a keda gravemente heridá i fayesé.

Na promé instante polis a kere ku tabata trata di un aksidente ku morto, pero despues di investigashon a konsiderá e kaso komo asesinato.

For di investigashon ku polis a hasi na e sitio a resultá ku probablemente shofùr di e vehíkulo a pèrd’é kontrol riba stür, dal kontra bòrchi di tráfiko, baha for di kaminda dal den un palu di lus pa despues bai dal den e palu di indju.

Dor di e impakto aki e shofùr a keda pegá den e vehíkulo i e okupante a risibí leshon na su garganta.

Durante investigashon, polis a konstatá ku tabatin perforashon di bala na e vehíkulo.

Por a mira ku e shofùr tabatin herida di bala na su skouder robes. Polis a haña i konfiská 2 ’huls’, den e área menshoná.

Despues di un investigashon ku a dura basta tempu, polis a detené Merced.

Segun testigunan e dia ei tabatin un problema na un toko chines na Soto entre Merced i e víktima  Mercera tokante parkermentu.

Dado momento e diskushon a bira asina fuerte i Merced lo a bisa Mercera ku e ta bai bin tir’e.

Despues di algun ratu un persona ta tira riba e vehíkulo di Mercera ku e konsekuensia ariba menshoná.

Polis durante un investigashon a tuma nota ku e number di telefòn di e akusado tabata mustra presis na e sitio kaminda e tiroteo a tuma lugá.

P’esei ta sospech’é di ta esun ku a tira e víktima mata despues di  diskutí kuné na e toko.

E akusado a bisa e no tin nada di aber ku e kaso i no ta esun ku a tira e víktima. Despues di diskushon el a bai kas pa motibu ku e mester a bai traha.

Esun ku a tira a pasa serka dje na kas i el a sinta den outo lubidá su telefòn.

Siguiente dia el a haña su telefòn bèk serka dje.

Segun Merced esun mes ku a tira a keda likidá algun luna despues na e bar Flor de Noruega.

Su abogado mr Athena Sulvaran a pidi pa skucha 4 testigu.

Ta trata di e kasá i ruman di e akusado ku por bisa ku e dia ei el a yega kas tempran pasó e mester a bai traha.

Tambe e abogado ke tende e doño di trabou ku por konfirmá ku e akusado tabata na trabou.

E abogado a pidi pa skucha tambe ruman muhé di esun ku aparentemente a tira i a konta su ruman di su akto.

Al final e abogado a pidi pa suspendé detenshon di e akusado pendiente tratamentu di e kaso.

Mirando e gravedat di e kaso fiskal a pidi hues pa rechasá e petishon pa “skors” detenshon di e akusado. Hues den su desishon a honra petishon di e abogado pa skucha e 4 testigunan i a rechasá pa “skors” su detenshon.

Awe e kaso lo keda tratá integralmente pa sa presis kiko lo a sosedé.