WILLEMSTAD.- Ministerio Publiko (OM) i Korte di hustisia ta prepara pa varios kaso di hopi peso den siman ku ta bini. Ta trata di kasonan ku sigur lo kapta atenshon di nos komunidat.

Djárason 12 di sèptèmber 2018 ta bai trata e kaso di tiramentu ku morto dia 25 di yanüari 2018 dilanti diskotèk Spoonz na Saliña. Den e mardugá Jeangianno Jonathan Alegandro Zimmerman a pèrdè su bida. Parti mainta Korte ta trata dos sospechoso. Nan ta C.B. (Kòrsou, 1990) i F.R.A.L. (Kòrsou, 1998). Despues di mèrdia ta toka turno na e hòmber D.E.S. (Ulanda, 1976). Tur tres ta ser akusá tambe di poseshon di un arma di kandela.

Djabièrnè 14 di sèptèmber 2018 ta trata e kaso di Ministerio Públiko kontra sr. Eric Garcia. Ta sospechá Garcia di malversashon di un suma grandi di plaka, labamentu di plaka i falsifikashon di dokumento na momentu ku e tabata kuratòr den faillisement di Banco de Maracaibo. E kaso aki ya kaba a bin Korte den forma di pro-forma i regiezitting. Djabièrnè ta bai trata e kaso ku kontenido. E kaso ta start 08:30 or di mainta.

Djabièrnè 14 di sèptèmber 2018 ta trata tambe un kaso kontra dos sospechoso, J.R.F. (Kòrsou, 1988) i T.L.M. (Kòrsou, 1995). Ta akusá nan di un atrako armá riba un trahadó di pòmp di gasolin Vanddis riba Weg naar Fuik i tambe menasa i tambe ladronisia di un kran di Easy Towing, plaka kèsh i un telefòn selular. Ámbos suseso aki a tuma lugá 31 di desèmber 2017.