WILLEMSTAD.- Den luna di Ougùstùs benidero korte di promé instansia lo presentá e kaso tristu i lamentabel di asesinato  ku a tuma lugá den kaya Hematita dia 3 di aprel último.

Ta trata di e kaso kaminda e víktima Edward Anthony Leito nasé na Kòrsou 12 desèmber 1947 a pèrdè su bida, despues ku el a keda asesiná den su propio kas durante un atrako. Outoridatnan ku a traha duru riba e kaso aki a logra detené 3 sospechoso te ku awor.

Tabata riba djaluna 3 di aprel 2017 alrededor di 09.39’or, Sentral di Polis a dirigí un patruya na Kaya Hematita pa un kaso di tiramentu.

Na yegada di e patruya nan a bin topa ku un hòmber - ku despues a resultá ku ta e habitante di e kas- drumí abou den balkon patras di e kas ku no tabata duna señal di bida. Un investigashon mas profundo na e kurpa di e víktima a resultá ku e tabatin herida di bala na e parti ariba di su kurpa.

For di un investigashon preliminar ku polis a realisá na e sitio a resultá ku un outo a kore drenta den kurá di e kas i a pasa bai patras di e kas. Einan tres(3) hòmber, dos(2) di nan kara tapá a baha for di outo i a bai den e kas menasá tur hende presente ku arma di kandela. E sospechosonan a asta agredí un mucha menor di edat i un di e habitantenan.

Despues di esei  bala a kai i alkansá e víktima mortalemente. E sospechosonan a kue algun pertenensia di e víktima i despues a hui for di e sitio.

Kámaranan ku tabatin rònt di e kas a logra yuda kondusí na detenshon di e akusadonan.

Un vehíkulo marka Vitz tambe a keda konfiská, sospechá di tabata e “get away car” ku e hòmbernan a uza pa nan fuga.

Den luna di ougùstùs e kaso lo keda presentá probablemente den pro forma.