Debí ku tin instalashon di 6 hues na “Kas di korte”

WILLEMSTAD. - Korte lo bolbe trata un kaso penal den un otro lokalidat ku no ta na Kas di korte. Esaki pa motibu ku netamente riba e dia ei lo tin instalashon di 6 hues den e sala grandi. E otro salanan den “Kas di korte” ku aktualmente ta situá den edifisio kaminda tabata KPMG no tin sufisiente espasioso pa trata un kaso grandi kaminda públiko tambe por ta presente.

Ta trata di e kaso di e asesinato ku a tuma lugá na e trùk di pan na Palu Blanku.

Despues di kasi 3 aña, korte di promé instansia ta bolbe presentá e kaso ku a tuma lugá entre e anochi di 20 pa 21 di yanüari 2018 na Palu Blanku.

Den e anochi en kuestion e víktima Gwensley Frederick (nasé na Kòrsou dia 29 di mart 1992) a keda likidá durante su ora di trabou na e trùk di pan. Ministerio Públiko na promé instansia a akusá Gherardi Jansen (22) pa e kaso i despues Christopher Rumay (24) komo kómplise.

Jansen a keda kasi 14 luna será, pero despues hues a bai di akuerdo pa suspendé su detenshon pendiente pa e kaso keda tratá.

Hues Edelenbos a haña ku no tabatin nada nobo den e investigashon, komo tal  el a bai di akuerdo ku abogado Sulvaran pa suspendé Jansen su detenshon.

Jansen semper a insistí riba su inosensia i a bisa ku e no ta esun ku a tira e víktima.

Tin algun testigu ku a bisa di a tende Jansen menasá e víktima, despues di un interkambio di palabra e anochi ei entre nan dos. Segun e testigunan despues ku Jansen a bai, un hòmber kara tapá a yega ku un arma i tira e víktima mata.

Otro testigunan a bisa ku nan a rekonos’é na su koló di kueru, postura i stèm, pero no tin nada konkreto.

E  abogado a splika ku niun hende por bisa ku ta Jansen ta esun ku a tira, pa motibu ku nan no a mira ku ta e  i no tin prueba.

Segun e abogado, doño di trùk di pan a deklará ku e sospechoso a kore drenta  den un Kia Picanto koló shinishi, despues di e suseso, pero despues a resultá ku ta tende el a tende esei di otro hende.

E abogado a sigui  bisa ku e anochi ei Jansen tabata pará na e trùk di pan bèrdat i asta tabata hasi wega ku e víktima. Pues ta imposibel  ku e la bai bin bèk i tir’é.

Durante pro forma Hues Edelenbos a  bai di kuerdo ku mr Sulvaran pa suspend’é detenshon  di Jansen na mart aña pasá bou di vários kondishon, mirando ku e investigashon no tabata kla.

Djabièrnè binidero otro hues den persona di mr Snitker lo bai trata e kaso na un otro lokalidat ku ta na Marjorie’s Party Palace.