Despues ku OM apelá nan libertat

WILLEMSTAD.- Ayera “raadkamer” mester a trata e kaso di e polisnan Dorand, Overman, Thomsjansen i Boelijn kual nan detenshon a keda suspendé pa hues komisario dia 24 di mart 2021.

Debí na e medidanan di COVID ku gobièrnu a stipulá, e kaso a keda posponé pa un tempu indefiní.

Ta trata di e kaso ku a haña e nòmber “Outpost”. Pa ku esaki Ministerio Públiko a apelá e desishon di hues komisario.

Ministerio Públiko ketu bai ta investigando e agentenan  ku ta wòrdu sospechá di a hasi nan mes kulpabel na robo den bibienda òf intento pa hasi esaki, violashon di lei di opio i abuzu di outoridat komo ámtenar.

Dia 24 di mart último, e agentenan por a bai kas den e sistema di aresto domisilio i bou di vários kondishon ku hustisia a imponé riba nan.

Tur 4 ta den restrikshon ainda i no mag di tin kontakto ku otro.

Ta trata aki di un kaso ku a tuma lugá den luna di sèptèmber/òktober 2020 na Daimarieweg.

E grupo di agente aki lo mester a tene un entrada hudisial sin pèrmit di fiskal ouksiliar i a konfiská entre otro sèn i droga kual nunka nan a deklará.

Den e investigashon  “Outpost” a detené  e 4 agentenan aki komo sospechoso.

Algun siman pasá a trata demanda di kustodia i hues-komisario a skucha e sospechosonan.

Hues-komisario a asigná e demanda de kustodia, loke ta nifiká ku e aresto preventivo di e 4 sospechosonan a keda prolongá ku 8 dia.

Dia 24 di mart abogadonan Vaders, Kleist i Osepa ta esnan ku a logra konvensé hues komisario pa suspendé detenshon di nan klientenan pendiente  mas investigashon.  Ayera a baha e tratamentu di nan kaso fo’i riba ròl i no a duna otro fecha ainda.