WILLMSTAD.- Korte di promé instansia awe lo mester a trata kaso di e hòmber B. “Junni” Roosje ( 64) .
Roosje ta keda akusá di a choka e dama venezolano Niloa Teresa Delgado Castillo di 47 aña mata dia 12 di mart 2020 den kaya Silantro.
Segun e akusashon, Roosje a choka e dama, strangul’é den kombinashon ku hork’é, tapando su boka i nanishi ku e konsekuensia ku e dama a stek muri.
Segun e rapòrt di outopsia, a haña hopi sanger den e tóraks di e dama. Esei a keda kousá dor di e slanan ku e dama a haña.
Riba su kolchon tabatin un kantidat di sanger i tambe sanger tabata basha fo’i su boka. Segun e investigashon, a haña rastro di dede di Roosje na 6 parti stratégiko di kurpa di e víktima. Tambe a haña rastonan di dede di e hòmber Koeiman, na 2 parti di kurpa di e víktima. Koeiman tabata biba ku e dama na kas di un hòmber paralítiko ku tantu e víktima komo Koeiman tabata kuida.
Aparentemente e dama tabatin un relashon ku Koeiman i tambe ku e akusado.
Banda di e kolchon, polis a haña un bòter di binager habrí kual a haña un tiki di e líkido den boka di e víktima Pero no a hañ’é den su kurpa. Polis ta pensa ku esaki tabata e strategia pa laga kere ku e dama a bebe binager pa mata su kurpa.
Segun e prosèsverbal di polis, a haña rastro di Roosje su dede, riba dòpi di e bòter di binager i riba e bòter di binager a haña man di Koeiman.
Polis a deskubrí ku e chip di e telefòn di e víktima a resultá den telefòn di Roosje.
Durante un kaso pro foma, Roosje a splika ku un dia e tabata kushiná i un pikòp blanku a bin pita na su kas. Un hòmber deskonosí a bin serka dje pa e yud’é ku su outo, el a bai pafó serka e hòmber i a laga su telefòn riba mashin di un vehíkulo, ku tabata para den su kurá. Ora el a sinti ku su sòpi tabata kimando riba stof, el a bisa e hòmber ku e ta bai paden pa wak su sòpi.
Pero ora el a bai pafó bèk, e no a haña e hòmber mas i su telefòn tabata habrí. El a haña e kos straño, pero no a para ketu. Ta despues el a komprondé ku e chip di e víktima tabata hinká den e telefòn.
Roosje a para riba ku e no sa ken ta esun ku a pone e chip den e telefòn. El a splika ku e pikòp ku a presentá na su kas, tabata paresido na esun di e hòmber Koeiman, ku e tabatin problema kuné algun tempu pasá.
Hues a bisa ku polisnan no por a haña telefòn di e dama niun kaminda.
Roosje durante di e kaso a keda grita ku e no tin nada di aber ku e asesinato.
El a grita ku e no por sinta kastigu di otro hende. “Mi no tin kurason pa mata hende. Asta ora ku mata mi bestianan, mi ta sinti”, segun e akusado. Hues a ninga e petishon di e abogado pa posponé detenshon di Rooje, mirando ku e akusashonnan den su kontra ta grave.
Awe e kaso mester a kontinuá pa skucha e hòmber Koeiman komo testigu
Pero debí na e medidanan di COVID ku gobièrnu di Kòrsou a stipulá ayera, a posponé e kaso pa un tempu indefiní.